Қазақтардың күнделікті тұрмыс-тіршілігі сан түрлі салт-дәстүрлерге, отбасылық, тұрмыстық әдет-ғұрыптарға толы. Осының бәрі рухани өмірінде көрініс тапқан ежелгі халықтың күрделі және бірегей этникалық мәдениетін қалыптастырады.
Қазіргі хор өнері халық музыкасы мен ұлттық классика дәстүрлеріне, «Тал бесіктен – жер бесікке...» қойылымы да қазақтың дәстүрлі әдет-ғұрыптарына негізделген. Қойылымда ұлттың даналығын, кеңпейілділігін, қонақжайлығын, философиясы мен дүниетанымын ашатын салт-дәстүрлер мен әдет-ғұрыптардың өзіндік кешені драматургиялық тұрғыда құрылған.
Хор әртістері ұлттық киімде, ұлттық нақыштағы өлеңдерді көркемдеп оқып, Дәулеткерейдің «Қамажай», «Қосалқа» (өңдеген Е.Корабейникова), «Қуырмаш» (өңдеген Ә.Әбдінұров), Е.Хасанғалиевтің «Келші, келші, балашым», Құрманғазының «Балбырауын» (өңдеген Е.Абылай), «Он алты қыз» (өңдеген Ғ.Берекешов) және т.б. хорға арнап өңделген қазақтың халық әндері мен қазақкомпозиторларының шығармаларын орындады. Концертке Камералық хордың орындаушылары Жұбаныш Зетова, Индира Айтберген, Абылай Ерболат, Еркебұлан Әбдіқалықов, Мәди Айтасов, Бақытгүл Шәкім, Ғазиза Жүсіпбекова, халық әні бөлімінің әртістері – Данияр Мұқан, Сәулежан Тағзия, Өзгеріс Шерікбай қатысты. Жетіген партиясын «Сарыарқа» халық музыкасы ансамблінің әртісі Қарагөз Гасимова орындады.
Камералық хордың көркемдік жетекшісі және бас дирижеры – Қазақстанның еңбек сіңірген қайраткері, профессор Гүлмира Құттыбадамова, дирижер – Данара Ташатова, концертмейстер – Гүлден Базыкен. Айта кетейік, Камералық хор – халықаралық байқаулар мен фестивальдердің жеңімпазы, атап айтсақ, «World Choir Games» екі алтын медалі (Латвия, 2014), «Шабыт» XVII халықаралық шығармашыл жастар фестивалінің бас жүлдесі, «Budapest International Choral Celebration» халықаралық хор фестиваліне қатысу (Мажарстан, 2015), «The Heart of Chorus – 2019» халықаралық фестивалінің бас жүлдесі (Қытай, 2019) және т.б. бар. Осы жеңістердің барлығы ұжымның кәсібилігі мен шеберлігін айқын көрсетеді.
