Бразилиялықтардың «балеті» аяқталды
Эр-Райяндағы кездесудің сөзсіз фавориті Бразилия құрамасы еді. Олар 1/8 финалда Оңтүстік Кореяны 4:1 есебімен ойсырата ұтқанда, жанкүйерлер «енді Неймар бастаған жігіттерді тоқтататын күш жоқ шығар» деп пайымдады. Бірақ Златко Даличтің бұл ойынға өз жоспары болды. Оңтүстік Америкадан келген оғландардан еш қаймықпаған хорваттар 120 минут бойы аянбай айқасты. Иә, Тите шәкірттерінің қарсыластарына қарағанда гол соғуына мүмкіндіктері едәуір көп болғаны рас. Алайда сын сағатта қарт құрлықтың өкілдері бір жұдырық болып жұмыла білді. Оның үстіне, қақпашы Доминик Ливаковичтің мінсіз ойыны тамсандырды. Ол өз қақпасын талай қауіпті жағдайдан аман алып қалып, барлығы 11 сейв жасады.
Негізгі уақыт тең аяқталды. Овертаймда бразилиялықтар есеп ашты. 105-минутта Неймар мергендік танытты. Бірақ олардың қуанышы ұзаққа созылмады. Үзілістен кейін жанұшыра алға ұмтылған хорваттар керемет комбинация ұйымдастырды. Оның ақыры Бруно Петковичтің ғажап гол соғуымен аяқталды. Есеп – 1:1.
Пенальти соғу барысында Хорватия футболшылары барлық мүкіндіктерін ұтымды пайдаланды. Никола Влашич, Ловро Майер, Лука Модрич және Мислав Оршич нысананы дәл көздеді. Қарсыластары екі мәрте қателесті. Родриго тепкен допты Ливакович кері қайтарса, Маркиньос бағанаға тигізді. Есеп – 4:2. Осылайша, хорваттар жартылай финалға жолдама алды. Ал бәсеке аяқталған бетте алты жылдан аса Бразилия құрамасының бас бапкері болған Тите өз еркімен қызметінен кететінін ресми түрде мәлімдеді.
15 ескерту жасалған ойын
Өзгелерді айтпағанда, тісқаққан букмекерлердің өздеріне Нидерланд пен Аргентина құрамалары арасындағы кездесудің жеңімпазын анықтау оңайға соққан жоқ. Тіптен, көпті көрген кәнігі мамандар мен сақа сарапшылардың пікірлері де екіге жарылды. Бастапқыда біз іш пыстырарлық ойынның куәсі болдық. Жарты сағаттан аса уақыт бойы қос команда бір-бірінің қақпа маңына маңайлай алмады. Көбіне-көп тартыс алаң ортасында өрбіді. Тек 35-минутта Лионель Мессиден жақсы пас алған Науэль Молина есеп ашты. Алайда одан кейін де көпке дейін ойын жоғарыдағыдай сценарий бойынша өрбіді.
73-минутта Месси 11 метрлік нүктеден нысананы дәл көздегеннен кейін барлығымыз да «Луи ван Гал шәкірттері енді ештеңе өзгерте алмайды» деп ойладық. Бірақ мұнымыз бекер екен. Тек содан кейін барып қана ес жиған нидерландтықтар намысқа қамшы басты. Нәтиже көп күттіреген жоқ. 83-минутта Ваут Вегхорст есеп айырмашылығын қысқартты. Негізгі уақытқа төреші Матеу Лаос тағы 10 минут қосты. Сол уақыт аяқталар тұста «Қызғалдақтар елінің» футболшылары таразы басын теңестіріп кетті. Айып алаңында Тён Копмейнерс өзі тепкеннің орнына допты бір топ қорғаушы арасынан Вегхорстқа сырғыта салды. Ол мүлт кеткен жоқ – 2:2. Овертаймда жеңімпаз анықталмады. Содан пенальти соғылды. Нидерланд құрамасының серкесі Вирджил ван Дейк пен Стивен Бергейс орындаған алғашқы екі соққыны қақпашы Дамиан Эмилиано Мартинес керемет сейвтермен кері қайтарды. Сол кезде аргентиналықтардың жартылай финалға шығатынына ешкімнің күмәні болмады. Айтқандай-ақ, Лионель Скалонидің командасы көздеген мақсатына қол жеткізді. Жеңіс голын Лаутаро Мартинес соқты – 4:3. Осы сәтсіздікке төзе алмаған 71 жастағы танымал бапкер Луи ван Гал отставкаға кетті.
Аталған бәсеке барысында 45 жастағы испаниялық қазы Матеу Лаос қос команданың ойыншыларына 15 мәрте ескерту жасады. Бұл – әлем чемпионаттары тарихындағы тағы бір рекорд!
Марокко мықты екен
Сенбіден жексенбіге қараған түні Дохадағы «Әл-Тумама» стадионына жиналған 45 мыңға жуық жанкүйердің барлығы да тек Марокконы қолдағандай әсер қалдырды. Олай деуге негіз, олар шабуылға шықса, барша көрермен айғайға басып, сырнайлатып, кернейлетті. Ал доп Португалия ойыншыларына тисе, керісінше, жақтырмағандай сыңай танытты. Соның әсері болса керек, қара құрлықтан келген жігіттер өте сенімді ойнады. Плей-оффтың алғашқы кезеңінде Пиреней түбегінің түлектері Швейцарияны 6:1 есебімен ойсырата ұтқаны белгілі. Ол кезде қарсыластары бірден тізгінді өз қолдарына алуға тырысқан. Ал ондай ойын мәнері португалиялықтарға жақсы жағады. Содан марокколықтар жақсы сабақ алған екен. Олар ойын тізгінін Португалияға беріп қойды да, өздері қарымта шабуылға жүгінуді жөн көрді. Бұл тактика өз жемісін берді. 42 минутта Эсефф Эн-Насери қақпашының өрескел қателігін пайдаланып, допты торға тоғытты.
Португалия құрамасы үзілістен кейін де жағдайды түзей алмады. Амалы таусылған Фернанду Сантуш 51-минутта Криштиану Роналдуды алаңға шығарды. Бірақ аты аңызға айналған шабуылшының өзі де жағдайды өзгерте алған жоқ. Бұл команданың сапында Жуан Феликс өте белсенді болды. Алайда оның тепкен доптарының барлығы да қақпадан жоғары кетті. Басқалары да ештеңе өндіре алмады. Тағы бір сәтте доп маңдайшаға тиді. Сөйтіп, 1:0 есебімен жеңіске жеткен Марокко жартылай финалға шықты. Олар тек Африка құрлығы ғана емес, араб әлеміндегі осы межеге жеткен тұңғыш команда ретінде тарихта қалды.
Харри Кейннің қорлығын-ай!
Көп ұзамай Әл-Хаурдағы «Әл-Байт» стадионындағы Англия мен Франция құрамалары арасында алапат айқасты тамашаладық. Алғашқы тайм толықтай француздардың басымдығымен өтті. Олар өте сенімді ойнап, қарсыластарын қос қапталдан жиі-жиі қыспаққа алды. Ағылшындар ара-тұра шабуылдағанымен, өте сақ ойнауға тырысты. Сырт көзге олар қарсыластарынан қаймығып жүргендей әсер қалдырды. Олай деуге негіз, қит етсе, допты артқа беріп, тәуекелге бармады. Ал доп Килиан Мбаппеге тисе, бірнеше ойыншы оны қоршауға алып, әбден әбігерге түсті. 17-минутта француздардың кезекті бір шабуылынан кейін есеп ашылды. Жартылай қорғаушы Орельен Тчуаменидің шамамен 22 метрдей қашықтықтан қақырата тепкен добы қақпа торынан табылды.
54-минутта Харри Кейн 11 метрлік нүктеден таразы басын теңестірді. Нағыз қызық содан кейін басталды. Қос команда алма-кезек қауіпті шабуыл ұйымдастырып, көрермендердің делебесін әбден қоздырды. Бірақ басымдық бәрібір француздар жағында болды. Олар ширақ әлі сенімді қимылдады. Нәтижесінде, 78-минутта Оливье Жиру әлем чемпиондарын алға шығарды. Десек те матчтың соңына таман Англия құрамасының да гол соғуына мүмкіндігі болды. VAR-дың көмегіне жүгінген төреші Уго Льористің қақпасына тағы пенальти белгіледі. Бірақ бұл жолы Кейннің тепкен добы маңдайшадан әлдеқайда биік кетті. Есеп – 2:1. Ұзақ жылдар бойы Тұманды Альбион елінің басты сұрмергені саналып келген сақа ойыншының жүйкесі сын сағатта сыр берді. Соның салдарынан ағылшындардың жүлделі орындар үшін талассақ деген үкілі үміті үзілді. Ал Дидье Дешамның командасы жартылай финалға жолдама алды.
Осылайша, жартылай финалға шыққан төрт мықты команда анықталды. Енді 13 желтоқсанда Лусаилда Аргентина мен Хорватия күш сынасса, келесі күні Марокко мен Франция шеберлік байқасады. 17 желтоқсанда қола медаль үшін тартысты тамашаласақ, ал биылғы әлем чемпионатының жеңімпазы 18 желтоқсанда анықталады.
Парламент Мәжілісінің депутаты
Сауытбек Абдрахманов:
Егер футболда ойын тағдырын тек шеберлік шешетін болса, ол дәл мұндай танымал болмас еді деп те ойлаймын. Футболдың жаһан жұртшылығының жүрегін жаулап алған күші тек спорттың шеңберінде қалып қоймайтындығында, оның заңдылықтарына бағынбайтындығында, домалақ доптың дөңгеленген дүниедей тылсымдығында, ойын нәтижесін кейде болмашы қателік, кейде тіпті ғайыптан тайып келе қалған кездейсоқтық шешіп кете беретін кереметінде, қысқасы, өмірдің өзіндей өзгермелілігінде. Сонысымен де әрбір футбол матчы қайталанбайтын спектакль сипатымен бізді өзіне тарта береді, тарта береді.
IT маманы, абайтанушы
Сұлтан Ыбырай:
Бразилия, Португалия... Жалпы әлемді әділетсіздік билеп кеткендей көрінеді, көрінгенде билеп тұрғаны да рас қой... Біреулер футбол өлді депті. Мәселе, Роналдудың көз жасында емес. Бап шаппады, бақ шапты. Никола Тесла мен Ибн Батута ұрпақтары үшін.
