Қазақ армиясының тарихында Бауыржан Момышұлының есімі ерек. Өр мінезімен, қолбасшылық қырымен, пайым-парасаты һәм ұлтжандылығымен аты аңызға айналған тұлғаны әскери өмірдің айнасына айналғысы келетін әрбір офицер үлгі тұтады. Олай болса, ел өміріне қатысты аса жауапты міндет жүктелген әскери бөлімге батыр атының берілуі заңды. Салтанатты іс-шараға Бауыржан Момышұлының келіні Зейнеп Ахметова, генерал И.В.Панфиловтың немересі Алуа Байқадамова, сондай-ақ еңбек және соғыс ардагерлері қатысты.
Жиналғандар даңқты қолбасшыны құрметпен еске алып, өмірі мен шығармашылығы хақында қызықты деректерге қанық болды. Ерлік туралы естеліктер айтылып, ұрпақ тәрбиелеуде батырды үлгі етудің маңызы сөз болды.
– Ата ел-жұртының, ұрпағының арасында жүр. Батырын қадірлеген қалың елі, ұрпағы атын жаңғыртып, бүгін тағы да аруағын аспандатты. Даналар «Сөнген жұлдыздың жарығы миллион жылға жетеді» деген екен. Атаның жұлдызы әлі де жарқырап тұр, – деген Зейнеп Ахметова жас сарбаздарға жігер берді.
1998 жылғы 4 желтоқсанда Қазақстан Республикасы Ішкі істер министрінің бұйрығына сәйкес құрылған 5571 әскери бөлімі осы уақытқа дейін қаланың қоғамдық тәртібін, түрлі қоғамдық-саяси, спорттық іс-шараның тыныштығын сақтау міндеттерін атқарып келген 5449 әскери бөлімінің заңды ізбасары. Мерекелік жиында бөлімге батыр есімін беру туралы Үкімет Қаулысы салтанатты түрде табысталды.
– Екінші дүниежүзілік соғыс – тактика мен стратегияны былай қойғанда, әскери техниканың, қару-жарақтың заманауи үздік үлгілерінің шайқасы болды. Командирлердің әдіс-айласын әскери техниканың мүмкіншіліктерімен үйлестіріп, үлкенді-кішілі атыс-шабыста азуына дейін қаруланған жауға тойтарыс беріп қана қоймай, ұрыс даласының басты тұлғасы қатардағы жауынгерді аман алып қалудың да амалын табу – қолбасшы Бауыржан Момышұлының негізгі қағидасы еді. Соғыс жүріп жатқан кезде-ақ қазақ халқының даңқын шығарып, абыройын арттырып, ұлттың батырына айналған Баукең Мәскеу түбіндегі шешуші шайқаста қапияда ой тапқан, қараңғыда жол тапқан ерен ерлігі мен даңқы әлемге жайылып, аты аңызға айналған қолбасшы ретінде танылды. Бүгінгідей атаулы күнде 5571 әскери бөлімінің басшылығы мен жеке құрамының қызметіне зор табыстар тілеп, жүктелген міндеттерін атқаруда табанды болуға тілектестік білдіреміз, – деді «Оңтүстік» өңірлік қолбасшылығы қолбасшысының тәрбие және әлеуметтік-құқықтық жұмыстар жөніндегі орынбасары полковник Нязтай Әлкешев.
Іс-шара барысында бөлім командирі полковник Бақдәулет Оспанбеков жеке құрамды патриоттық рухта тәрбиелеуге, жауынгерлік қызмет міндеттерін шешуде өзара әрекеттестікті нығайтуға қосқан үлесі үшін бірқатар қонақты арнаулы наградалармен марапаттады. Салтанатты рәсімнен соң іс-шараға жиналғандар Қазақ ұлттық қыздар педагогикалық университетінің көркемөнерпаздары мен «Генерал» тобының концерттік бағдарламасын тамашалады.
