31 жастағы боксшы кәсіпқой рингте 2015 жылдан бері күш сынасып жүр. Сол аралықта 22 кездесу өткізіп, тек біреуінде ғана қарсыласына есе жіберді. 16 қарсыласын есінен тандырды. Б.Жүкембаев жекпе-жектерінің денін Канадада өткізді. Барлық бәсекеде басымдық танытып, екінші дәрежелі түрлі белбеуді иеленді. 2021 жылдың 29 мамырында қандасымыз АҚШ-тың Калифорния штатындағы Карсон қаласында кубалық Сабриэль Матиаспен жұдырықтасты. Егер сол кездесуде Батыр жеңіске жеткенде, IBF нұсқасы бойынша алтын белбеуден үміткерлер санатына қосылатын еді. Бірақ бұл бәсеке Бостандық аралы өкілінің жеңісімен аяқталды. Сегізінші раундтан кейін Жүкембаев жекпе-жекті жалғастырудан бас тартты.
Алматыдағы жарыста қазақ боксшысы Холани Мкотелимен қолғап түйістіреді. «Жолбарыс» деген жанама есімге ие Оңтүстік Африка Республикасының (ОАР) өкілі 26 рет шаршы алаңға шығып, 19 кездесуді өз пайдасынан шешті. Ол 12 қарсыласын ұрып жыққан.
