Айта кетейік, Сент-Эндрюс (SАFF) – халықаралық кинофестиваль. Бұл Шотландия мен бүкіл әлем бойынша кино саласындағы таланттардың есімдері белгілі болатын айтулы іс-шара. «Мұқағали» көркем фильмі бір жылда 10 халықаралық сыйлыққа ие болды. Бұл – бұрын-соңды болмаған үлкен қуанышты жаңалық. Барша қазақ киносын қадірлейтін көрерменге алғысымды білдіремін. Қазақтың ұлы ақыны ұлықталған фильм жастарға тек шабыт берсін. Тәуелсіздік күні қарсаңында әлемнің белді сыншылары өз бағасын берген «Мұқағали» фильміне берілген бұл жүлделер – қазақ халқының ортақ жеңісі!» деді фильмнің режиссері Болат Қалымбетов.
Белгілі қазақ ақыны Мұқағали Мақатаевтың 90 жылдығына арналған «Мұқағали» картинасы оның өмірінің соңғы жылдары туралы баяндайды. Фильмді Мәдениет және спорт министрлігінің тапсырысы бойынша Ш.Айманов атындағы «Қазақфильм» киностудиясы түсірді.
Қазақстандық прокатқа фильм 2021 жылдың 21 қазанында шыққан болатын. Фильмнің әлемдік премьерасы ХХV (PÖFF) «Таллин кинофестивалі» аясында өтті, онда қазақстандық картина экуменикалық қазылар алқасының жүлдесіне ие болды.
Айта кетейік, осы жылдың наурыз айында өмірбаяндық картина Кераладағы (Үндістан) 26-шы Халықаралық кинофестивальдың «Әлемдік кино» секциясында ұсынылды. Қыркүйек айының басында «Мұқағали» фильмі Қазан кинофестивалінде қазылар алқасының арнайы жүлдесіне ие болды. Сондай-ақ фильм Гатчиндегі (Ресей) «Әдебиет және кино» халықаралық кинофестивалінде қоюшы-суретші Ермек Өтегеновтің үздік жұмысы үшін қазылар алқасының арнайы дипломына ие болды. Қазан айында фильм Дубайдағы «META Film Fest» кинофестивалінде 70-тен астам фильм ішінен бас жүлдеге ие болды.
