Ілкімді шараға Астана қаласының денешынықтыру және спорт басқармасының басшысы Самат Жылқыбаев, Спорт және денешынықтыру істері комитетінің басқарма басшысы Мұхамеджан Бекназаров, Парламент Мәжілісінің депутаты Мақпал Тәжмағанбетова, Астана қаласының және Әзірет Сұлтан мешітінің бас имамы Ерболат Нұрылдаұлы, Дене мүмкіндігі шектеулі тұлғаларға арналған спорттық даярлау орталығының орынбасары Әділхан Өмірзақов, белгілі айтыскер ақын Балғынбек Имашев және «Көзімнің қарасы» мүгедектер қоғамдық бірлестігінің төрағасы Жүзбай Серікұлы қатысып, спортшыларға сәттілік тіледі.
Ашық біріншілікте Астана қаласының денешынықтыру және спорт басқармасының басшысы Самат Сәбитұлы алғы сөз алып, құттықтау тілегін білдірді. «Бүгінгі жарысымыз алда келе жатқан ұлттық мереке Тәуелсіздік күніне орайластырылды. «Showdown» үстел теннисі елордада алғаш рет өткізіліп отыр. Енді астаналық зағип жандар елімізде енді ғана даму қарқынын алған «Showdown» ойынын игеріп, республикалық, халықаралық жарыстарда топ жарады деген сенімдемін», дей келе мүмкіндігі шектеулі жандар арасындағы «Showdown» үстел теннисінің І қалалық ашық чемпионатын ашық деп жариялады.
Ал «Көзімнің қарасы» мүгедектер қоғамдық бірлестігінің төрағасы Жүзбай Серікұлы шет мемлекеттерден осы ойынды зерттеп, Қазақстанға әкелсем деген ойының жүзеге асқанына қуанып, алдағы уақытта 19-шы Дүниежүзілік зағип жандар күніне орай республикалық турнир өткізу жоспарымен бөлісті. Мамандардың айтуынша, Канада, Германия, Болгария сияқты шет мемлекеттерде жақсы дамыған бұл спорт түрі көз жанарынан айырылған зағип жандардың денсаулығына өте пайдалы. Яғни есту қабілетімен қол-аяқ қозғалысы жұмыстарын жақсартады.
Әлемдік деңгейдегі жарыстарға қатысу үшін отандық құрама команда жасақтау мақсатында ұйымдастырылған чемпионаттың жеңімпаздары арнайы дипломдармен, медальдармен, сыйлықтар және кубоктармен марапатталды. Сондай-ақ барша қатысушыларға демеушілер тарапынан қаржылай сый-құрмет көрсетілді.
Айта кетейік, шарапаты мол шараны ұйымдастырушылар Астанада бірінші рет өткізілген жарысты алдағы уақытта еліміздің басқа да өңірлерінде іріктеу кезеңін өткізіп, республикалық турнир өткізуді жоспарлап отыр.
