Оның айтуынша, жаңа жылдық мерекелер қарсаңында елімізде «Пиротехника» жедел-алдын алу іс-шарасы өткізіледі. Оның мақсаты - базарларда сертификатталмаған пиротехникалық бұйымдарды сату фактілерін анықтау және олардың жолын кесу.
«26 желтоқсанда республика бойынша құрылған мобильді топтар базарларды, дүкендерді және басқа сауда орындарын, сондай-ақ пиротехникалық бұйымдарды тасымалдаудың заңдылығын тексеру бойынша 400-ге жуық рейдтік іс-шаралар өткізді. Нәтижесінде ҚР ӘҚБтК-нің 196-бабы бойынша «Тауарлармен немесе өзге де заттармен заңсыз сауда жасау» бойынша пиротехникалық бұйымдарды заңсыз өткізудің 75 фактісі анықталды. Баптың санкциясында 25 АЕК немесе 76 575 теңге мөлшерінде айыппұл қарастырылған. Бұзушылардан 1850 данадан астам сертификатталмаған пиротехникалық өнім тәркіленді», деді Әміржан Байғошев.
Мәселен, елордалық сауда үйлерінің бірінің іргелес аумағында пиротехникалық бұйымдарды заңсыз сату фактісі анықталып, 97 дана заңсыз өнім тәркіленді. Сатушыға қатысты 196-бап бойынша әкімшілік хаттама жасалып, айыппұл салынды.
