Астанадағы Вена фестивалі

Фестивальдің көркемдік жетекшісі, белгілі дирижер Абзал Мұхитдиннің айтуынша, мәдени іс-шараға әлемге танымал жас таланттар қатысады.

– Мәселен, жапониялық дирижер Вена консерваториясын тәмамдап, Музикферайн концерт залында филармониялық оркестрге дирижерлік етсе, Эстониядан келетін маэстро «Травиатаға» дирижер болды. Осыдан-ақ олардың кәсіби шеберлігі жоғары маман екенін білесіз. Біз фестиваль репертуарын увертюра стилі тұрғысында және танымал симфониялар мен концерттер қағидаты бойынша таңдадық. Ал аспаптық концерттерді біздің театрдың үз­дік музыканттары орындайды, – деді ол.

XVIII ғасырда Аустрия ас­танасында классикалық музыка шарықтау кезеңін бастан кешті. Әсіресе Вена мектебінен шыққан ұлы композиторлар – Гайднның бекзат әсемдігі, Моцарттың таңғаларлық әуе­ні, Бетховеннің қуатты қолтаң­басы тыңдармандарын ерекше әсерге бөледі. Бүгінде Вена классицизмінің таңдаулы музыкалары ешкімді бей-жай қалдырмайды.

Айта кетейік, бас қала тө­рінде салтанат құратын Ве­на клас­сикасының фести­валі К.Байсейітова атындағы Каме­ралық залда 13 қаңтарда бас­талады. Бұл кеште театрдың симфониялық оркестрі моңғо­лиялық дирижер Мунх­баяр Эрдэнэбаатардың жетекші­лігімен өнер көрсетеді. Солист – «Астана Операның» бірінші скрипкасы Бағдат Әбілханов. 19 қаңтарда театр оркестрінің музыканттары эстониялық маэс­тро Ханно Мёлдеркивидің же­текшілігімен сахнаға шы­ғады. Мұнда Дамиля Мах­пирова гобойда жеке орындайды. Сондай-ақ 25 қаңтар­да «Астана Операның» Үлкен залында театрдың сим­­фо­ния­лық оркестрі мен хоры дирижер Абзал Мұхит­диннің же­текшілігімен В.А.Мо­царт­тың шұрайлы шы­ғар­ма­лары – №40 симфония мен Реквиемді ұсынады. Жеке партияларды орындайтын­дар: сопрано – Жәмила Жар­қымбаева, альт – Салтанат Мұратбекова, тенор – Рамзат Балакишиев, бас – Шыңғыс Ра­сылхан. Бас хормейстер Ержан Дәуітов. 31 қаңтарда Израильден келген дирижер Арик Гольдштейн, солист – пианист Долорес Үмбетәлиева оркестр әртістерімен мазмұн­ды бағдарлама тарту етеді. Ал 7 ақпандағы фестивальдің қорытынды концертінде маэс­тро Коки Гонгуй Янг (Жапо­ния-Қытай) қонақ болады. Ол сол күнгі кеште елордалық театр­дың симфониялық оркес­тріне жетекшілік жасайды.