ТҚС қызметкері қайтыс болды, күйік шалған тағы үш ер адам Маңғыстау облыстық ауруханасына жатқызылды.
Бүгін сағат 18:20-да Маңғыстау облысы ТЖД «101» пультіне Ақтау қаласындағы техникалық қызмет көрсету станцияларының бірінде өрт шыққаны туралы хабарлама түскен.
Төтенше жағдайлар министрлігі өрт кезінде 6 тұрмыстық газ баллоны жарылғанын хабарлады.
Бұл ретте өртті жою барысында өрт сөндірушілер өз өмірлеріне қауіп төніп тұрған тағы 17 газ баллонын шығарып үлгерді. Өрт сағат 18:48-де сөндірілді. Өрт аумағы 50 шаршы метрді құрайды.
Өртті ауыздықтауға 25 өрт сөндіруші-құтқарушы қызметкерлері жіберілді. Сондай-ақ 6 бірлік өрт сөндіру техникасы жұмылдырылды. Оқиға орнына ТЖМ Апаттар медицинасы орталығының қызметкерлері жіберілді.
