Бұған дейін Алматы қалалық Полиция департаменті Рамиль Мухоряповтың сөзіне сүйеніп, әлеуметтік, ұлттық, рулық, нәсілдік, таптық және діни араздықты қоздыру фактісін тексеру үшін сотқа дейінгі тергеуді бастаған еді.
«Сотқа дейінгі тергеп-тексеру нәтижелері бойынша қылмыстық қудалау органы Қылмыстық іс жүргізу кодексінің 35-бабының 1-бөлігі 2-тармағына сәйкес қылмыстық құқықбұзушылық құрамының болмауына байланысты істі тоқтату туралы процессуалдық шешім қабылдады. Алматы қаласының прокуратурасы процессуалдық шешіммен келісті», деді Алматы қаласы прокурорының орынбасары Нұрлан Ауғанбаев.
Еске сала кетсек, өткен жылдың қазан айында кәсіпкер, Choco холдингінің басшысы Рамиль Мухоряпов Ресейден көшіп келгендермен кездесуінде қазақ тіліне қатысты сөз айтып, басы дауға қалған еді. Желі қолданушылары Мухоряповтың бұл қылығын теріс қабылдап, айыптаған. Кейінірек Рамиль Мухоряпов Қазақстан халқынан кешірім сұрап, арнайы видеоны желіге жүктеген.
Гүлшахра САНСЫЗБАЙ
