Зауыт басшылығының айтуынша, өткен жылц 614,2 миллиард теңгенің өнімі өндірілді. Былтыр зауыт құны 21,5 миллиард теңге болатын өнім экспорттады. Қазір кәсіпорында 2 мыңнан астам адам жұмыс істейді.
Allur автомобиль зауытының жаңадан іске қосылған желісі Kia Sportage моделіне арналған. CKD – шанақтарды дәнекерлеу, бояу және құрастыру жөніндегі технологиялық жұмыстарды жүзеге асыратын шағын торапты автомобиль өндірісі. Ол үшін арнайы цехтар ашылған. Kia өндірісінің осы технологиялары Орталық Азия мен ТМД бойынша Қазақстанда ғана орналасқан.
Президент зауытты аралау барысында жас жұмысшылармен әңгімелесіп, оларға қолдау білдірді.
«Шын мәнінде, зауыт өте керемет екен. Таза әрі өндіріс мәдениеті өте жоғары. Біз жаңа ғана Кіа Sportage көлігін көрдік. Бұл көліктің сапасы өте жоғары. Сондықтан сұраныс жоғары болады деп ойлаймыз. Біз келешекте инвесторлар шақырып бұл зауытты ұлғайтамыз. Зауыттың болашағына байланысты ешқандай мәселе жоқ деп ойлаймын. Жастарға үлкен мән беріп отырмыз. Сондықтан бәрі дұрыс болады», деді Қасым-Жомарт Тоқаев.
Зауыт өкілдері биыл Kia Cerato шығаратын CKD желісін іске қосу жоспарланғанын атап өтті. Сондықтан компания техникалық бағыттағы оқу орындарымен тұрақты жұмыс жүргізуді бастаған. Осы ретте кәсіпорын басшылығы техникалық оқу орындарының студенттері мен түлектеріне арналған 250 орындық кампус үлгісіндегі жаңа заманауи жатақхана құрылысының басталғанын мәлімдеді.
Kia корпорациясының вице-президенті Кан Хун Тэг алдағы өндіріс жоспарлары туралы және Kia Sportage CKD өндірісін дамыту туралы әңгімеледі.
