Жалпы, ақын музейінің ашылған күні ешқашан ескерусіз қалмаған. Жыл сайын осы күні түрлі мәдени іс-шаралар ұйымдастырылады. Біз айтып отырған көрме де – соның бір көрінісі. Іс-шараның негізгі мақсаты – тұғырлы тұлғаның шығармаларын насихаттау.
С.Сейфуллин музейінің ғылыми қызметкері Қабиден Қуанышбайдың айтуынша, көрмеге көрнекті қайраткердің латын және төте қарпімен шыққан еңбектерімен бірге ол құрастырған кітаптар қойылған. Солардың ішінен 1914 жылы жарық көрген «Өткен күндер» атты тұңғыш жыр жинағы мен 1927 жылы төте қарпімен, 1936 жылы латын графикасымен басылған, атақты «Тар жол, тайғақ кешу» мемуарлық романын ерекше айтуға болады. Сондай-ақ 1935 жылы Алматыдағы Қазақстан көркем әдебиет баспасынан Сәкеннің алғысөзімен шыққан Ыбырай Алтынсариннің жыр жинағы да бар. Бұл кітапқа ағартушының 25 өлеңі енген. Сонымен бірге көрме төрінен қаламгердің 1932-1935 жылдары шығармалары енген «Әдебиет майданы» журналы, 1973 жылы шыққан «Лотос» атты афро-азиялық өлеңдер альманахы және «Социалистан», «Экспресс» кітаптары мен жары Гүлбаһрамға 1929-1935 жылдары жазған хаттары орын алған.
