Журналистің жеңісі

Бұқаралық ақпарат құрал­дарында журналистердің алар орны бөлек екені белгілі. Со­нымен бірге, олардың жұмысын үйлесімді ұйымдастырып отыратын редакторлық қызметтің маңызы да ерекше. Қазақстандағы ақпарат айдынында редакторлық жұмыстың өзіндік ерекшелігін ескерген сыйлық та бар. Кезінде Алматы облыстық «Огни Алатау» газетін, республикалық әдеби «Простор» журналын табыс­ты басқарған белгілі қаламгер Геннадий Толмачев атындағы  жыл сайынғы сыйлық биыл «2014 жылғы БАҚ-тың таңдаулы редакторы» атымен берілді. Биылғы лауреаттар – «Казахстанская правда» рес­публикалық газеті» акционерлік қоғамы басқармасының төрағасы Александр Тараков пен Атырау­дың өңірлік «Сахара» газетінің бас редакторы Қуандық Батыров. Алдыңғы күні Алматыда сый­лықтың жаңа лауреаттарын конкурс жюриінің төр­аға­сы, ұлтымыздың аса көр­некті ақыны, қоғам қай­рат­кері Олжас Сүлейменов құт­тықтады. Біздің әріптесіміз – «Ка­захстанская правда» респуб­ликалық газеті» акционерлік қоғамы басқармасының төрағасы Александр Тараковтың еңбегін жоғары бағалай келіп, Олжас Омарұлы журналистер әулеті болып табылатын Тараковтардың қаламгерлік дәстүрге адалдығын атап айтып, Александр Юрьевич­тің шығармашылығына жоғары баға берді. Журналистік жолын «Ленинская смена» газетінде бастаған Александр Тараков «Казахстанская правдада» жиырма  жыл бойы жемісті жұмыс істеп келеді. Қазақстан Республикасы Журналистика академиясының академигі, Қазақстан Жазушылар одағының мүшесі болып табылатын оның қаламынан көптеген тамаша кітаптар туған. Әріптесімізді журна­лис­ти­кадағы тағы бір жеңісімен құт­тық­тап, жаңа шығармашылық табыстар тілейміз. Егеменқазақстандықтар.