«Қазақстан Республикасындағы сайлау туралы» Конституциялық заңның 28-бабы 9-тармағының талаптарына сәйкес сайлауға байланысты қоғамдық пікірге сауалнама жүргізуді Қазақстан Республикасының заңнамасында тәртіппен тіркелген, тиісті құжаттардың көшірмелерін қоса бере отырып, заңды тұлғалар жүзеге асыра алады.
Орталық сайлау комиссиясына жіберілетін хабарламада сауалнамаға қатысатын және осы салада тәжірибесі бар мамандар туралы, қоғамдық пікірге сауалнама жүргізілетін өңірлер туралы, қолданылатын талдау әдістері туралы мәліметтер көрсетіледі.
Сайлауға, бұқаралық ақпарат құралдарында, интернет-платформаларда сайлауға байланысты қоғамдық пікірге сауалнама нәтижелерін жариялау кезінде сауалнама жүргізген заңды тұлғаны, сауалнама жүргізуге тапсырыс берген және оның ақысын төлеген тұлғаларды, сауалнама жүргізу уақытын, жинау әдісін көрсету міндетті.
Дауыс беру күніне бес күн қалғанда (2023 жылдың 14 наурызынан 18 наурызына дейін) қоғамдық пікірге сауалнама нәтижелерін, сайлау нәтижелерінің болжамдарын, кандидаттарды немесе саяси партияларды қолдауға, өзге де зерттеулерді интернетте жариялауға жол берілмейді.
Сайлауға байланысты қоғамдық пікірге сауалнама жүргізу шарттарын бұзу адамды әкімшілік жауапкершілікке тартуға негіз болады (ӘҚБтК-нің 120-бабы).
Бұған дейін Мәжіліс депутаттарының кезектен тыс сайлауы 2023 жылдың 19 наурызында өтетіні хабарланған еді.
Бұған дейін Мемлекет басшысы Қасым-Жомарт Тоқаев Парламент Мәжілісі мен мәслихаттар депутаттарының кезектен тыс сайлауын тағайындау туралы мәлімдеме жасаған.
Сондай-ақ Қазақстан Республикасының Президенті жетінші сайланған Қазақстан Республикасы Парламенті Мәжілісін тарату және Қазақстан Республикасы Парламенті Мәжілісі депутаттарының кезектен тыс сайлауын тағайындау туралы Жарлыққа қол қойған еді.
Кейін Мемлекет басшысы барлық деңгейдегі мәслихаттардың өкілеттігін мерзімінен бұрын тоқтату туралы Жарлыққа қол қойды.
