Ақпараттар ағыны

* Елімізде 2020 жылға дейін 45 млн. шаршы метр тұрғын үй салынады. Бұл туралы Президент жанындағы Орталық коммуникациялар қызметінде өткен брифингте таратылған хабарламада айтылған. Осы уақыт аралы­ғында қалалардың 97 пайызы, ауылдық елді мекендердің 75 пайызы орталықтандырылған сумен жабдықталады. * Қазақстан балансында алтынның 2 мың тонналық қоры бар. Кеше бұл туралы мәлімдеген Индустрия жә­не жаңа технологиялар ми­нистрлігі геология және жер қойнауын пайдалану коми­те­тінің төрағасы Базарбай Нұра­баев осыған қатысты кеніш­тердің 76 пайызы пайдаланылып жатқанын айтты. Бүгінде мемлекет балансында 321 алтын кен орны тіркелген. * Қостанайда жыл соңы­на дейін металл илек зауыты қатарға қосы­ла­ды. Мұ­ны жеткізген облыс­тық кәсіп­керлік және индус­трия­­лық-инновациялық да­му басқармасының бөлім бас­­тығы Талғат Майшин жа­ңа өндірістің жобалық қуат­тылығы жылына 15 мың тонна металл илектеу екенін атап өтті. Мұндағы ұсақ сортты ме­талл өнімдері сегіз пеште шы­ғарылады. * Шымкент сахнасын­да әлем операсының жау­һар­лары орындалды. Оңтүс­тік Қазақстан облыстық опера және балет театры ұжы­мы­ның көрермен назарына ұсынған туындылары қата­рында  «Қамар сұлу» операсы да болды. Дирижер Рүстем Рыс­мағанбетов жетекшілік еткен симфониялық оркестр­дің сүйемелдеуімен шебер атқарылған туындыны өнер­сүйер қауым жылы қабылдады. * Шығыс Қазақстан облы­сының бір топ жетім балалары Қара теңіз жағалауында демалады. Осы аймақтың елден тыс жерлерде тұратын 75 тумасы сыйға тартқан 157 жолдама-сертификатты бүл­дір­шіндерге Өскеменде өткен бірінші Жерлестер форумында облыс әкімі Бердібек Сапарбаев пен Ресей Федерациясы Ғы­лым, білім, мәдениет және ақ­параттық саясат жөніндегі федерация кеңесі комитетінің төрайымы Зинаида Драгункина тапсырды. * Көкшетауда денсаулық сақтау саласының үздіктері мара­патқа ие болды. Дәрі­гер­­лердің төл мерекесі қар­саңында өткен салтанатты жиын­ға қа­тысқан Ақмола облы­сының әкімі Сергей Кула­гин кеше медициналық мекемелер басшыларына 7 жаңа көліктің кілтін табыс етті. * Павлодардың қоғамдық көліктеріне электронды жо­лақы төлемі жүйесі енгі­зі­луде. Қаладағы үш ірі тасымалдаушы мекеме қызығушылық танытып отырған бұл жобаға «SMART CARD SYSTEM» ЖШС инвестиция құюды өз мін­детіне алды. «ҚазАқпарат», 24KZ, Otyrar.kz, Alau.kz, Аltaynews.kz, Egemen.kz агенттіктері мен Павлодар облысы әкімдігі сайттары деректері бойынша дайындалды.