Бұл туралы Индустрия және инфрақұрылымдық даму министрлігінің кеңейтілген алқа отырысында вице-министр Алмаз Ыдырысов айтып берді. Оның мәліметінше, Атырау – Астрахан учаскесінің 277 шақырымының 140 шақырымында көлік қозғалысы қамтамасыз етілген. Айта кетейік, Батыс Қазақстан облысында 248 шақырымдай жолға күрделі жөндеу жүргізіліп, оның 129 шақырымында жол жүрісі қамтамасыз етіліпті. «Қазір тиісті жұмыстарды уақтылы аяқтау үшін қажетті материалдар дайындалып жатыр. Ақпан айынан бастап инертті материалдарды тасымалдауға арналған вагондар паркін ұлғайтуды жоспарлап отырмыз», деді вице-министр.
Бұдан бөлек вице-министр былтыр автожол жобаларының сапасын арттыру мақсатында заңнамалық деңгейде бірқатар түзету қабылданғанын атап өтті. Мысалы, кепілдік мерзімі кезеңінде авторлық қадағалау мен техникалық бақылаудың жауапкершілігі ортақ болады. Өз кезегінде Жол активтерінің ұлттық сапа орталығы елді мекендердегі көшелерде жүргізілген орташа жөндеуге ведомстволық сараптаманы жасайды.
Жалпы, биыл еліміздегі автомобиль жолдарының құрылыс және жаңғырту жұмыстарымен қамтылуы 10,5 мың шақырымға дейін жетпек. А.Ыдырысовтың айтуынша, осы жылы республикалық жолдардың желісі бойынша 7,3 мың шақырымға, сондай-ақ жергілікті желіде 3,2 мың шақырым жолды салып, жаңғырту жоспарланып отыр.
Айта кету керек, қазір еліміздің шығыс өңірінде Талдықорған – Өскемен, Қалбатау – Майқапшағай, Үшарал – Достық сынды ірі автожол жобалары жүзеге асырылып жатыр. 2023 жылы 180 шақырымға жететін Үшарал – Достық учаскесінде тиісті жұмыстарды толық аяқтау көзделген. Қалған учаскелер бойынша жаңа жабын арқылы жол қозғалысын ашу 2024 жылға межеленіп отыр.
Вице-министр Қызылорда – Жезқазған учаскесіндегі құрылыс туралы айта келе, биыл Ұлытау облысындағы жол учаскесінде тиісті жұмыстар басталатынын атап өтті. Жезқазған – Қарағанды жобасы бойынша да құрылыс жұмыстары басталатыны белгілі болды.
Мемлекет басшысының тапсырмасына сәйкес, былтырғы желтоқсан айында министрлік еліміздің көлік-логистикалық әлеуетін дамытудың 2030 жылға дейінгі тұжырымдамасын бекіткен еді. Тұжырымдама – саланы одан әрі дамытып, алдағы іс-қимылды айқындайтын негізгі құжат. Еліміздің транзиттік әлеуетін арттыру үшін былтыр теміржол саласындағы ірі инфрақұрылымдық жобалар жүзеге асырыла бастағанын айта кеткен орынды. Солардың ішінде сүйектісі деп 2022 жылдың қараша айында екінші торабының құрылысы басталған, теміржол көлігі саласындағы ірі жобалардың бірі – Достық-Мойынты теміржол учаскесін айтуға болады.
