Междуреченск кентінің маңындағы күдікті құрылыс полицейлердің назарын аударған. Бақылау барысында белгісіз адамдардың бір гектар жерді тас қоршаумен қоршап, ауыл шаруашылық қажеттіліктері үшін қажет емес жабдықтар әкеліп, трансформаторды электр желісіне қосқаны анықталған.
Кейін, прекурсорлар құйылған 20 канистрді тасымалдау кезінде полицейлер екі жергілікті тұрғынды ұстады. Ұсталғандардың айғақтары бойынша бұрынғы ферманың бір гектар жер учаскесін олардың серігі 18 миллион теңгеге сатып алған.
«Учаске биік қоршаумен бөтен көздерден толығымен жасырылған, тұруға арналған уақытша үй-жай, монша, гараж салынған. Ұсталғандар бүркеме ретінде қолданбақ болған малға арналған қора жабдықталған. Зертханаға арналған бөлек үй-жай салынған. Темір есіктің ар жағында бірнеше тарапқа бөлінген бөлмелер бар, олардың әрқайсысы жасанды желдетумен және қуатты сүзгілермен жабдықталған», делінген хабарламада.
ҚР ҚК-нің 296-бабы бойынша есірткіні өткізу мақсатынсыз аса ірі мөлшерде заңсыз дайындағаны, өңдегені және тасымалдағаны үшін қылмыстық іс қозғалды. Ол үшін жеті жылға дейінгі мерзімге бас бостандығынан айыру жазасы қарастырылған.
