Төтенше жағдай • 02 Ақпан, 2023

Әбігерге түсірген толассыз жауын

185 рет
көрсетілді
3 мин
оқу үшін

Түркістан облысында толассыз жауған жаңбырдың және қалың қардың еруіне байланысты Кентау, Түркістан қалалары мен Бәйдібек, Сауран, Ор­да­басы аудандарындағы тұрғын үйлерді су басу қаупі туындады. Та­биғи апатқа жол бермеу мақсатында бар­лық шара қолданылды.

Әбігерге түсірген толассыз жауын

Төтенше жағдайлар депар­таментінен 56 қызметкер, 10 техника, 20 мотопомпа және жергілікті атқарушы орган­дар­дың күш­терімен суды сору және арықтарды та­залау жұ­мыстары жүргізілді. Сондай-ақ Сауран ауданындағы ауыл көшелері мен үй аулала­рынан суды шығару жұмыстары бойынша шұғыл іс-шаралар атқарылды.

«Бүгін қатты жауған жаң­бырдың және қардың бірден еруінің салдарынан судың дең­гейі көтеріліп, төмен қарай арналар­мен ағып жатыр. Нәти­жесінде, қала, аудан­дардағы бір­шама көшелер мен аулаларды су басу оқиғалары орын алып жатыр. Қазіргі таңда Кентау қаласы мен Бәйдібек ауданындағы судың мөлшері төмен түсіп, елді мекендерге қауіп төніп тұрған жоқ. Бірақ Сауран ауданындағы жағдай елді мекендерге қауіп төндіріп тұрғаны байқалады. Су тасқынына байланысты Сауранда мек­теп оқушылары онлайн оқуға кірісті. Ақпа­раттарға сәйкес, су басқан үйлер мен зар­дап шеккендер жоқ», дейді Түркістан облыс­тық ТЖД бастығының орынбасары Ерік Сарыбаев.

Жаңбыр суын сору жұмыс­тары күшей­тілген режімде жүр­гізіліп, жергілікті ат­қарушы органдар мен департаменттің жеке күш құралдары асфальттарды ойып, көше бойында жиналған суды каналдарға және қауіпсіз аймаққа жіберу жұмыстарын жүр­гізіп жатыр. Аталған қала, аудандар­да жау­ған жауын-шашын әсерінен көшелерді су басу жағдайы тіркелген. Сондай-ақ жауын-шашын көп болып, тұман түсуіне байланысты облыстық полиция департаментінің қыз­меткерлері, жүргізушілер мен жаяу жүргіншілерге жолдарда сақ болуды ескер­тіп жатыр. Себебі мұндай ауа райында көлік құралын басқару қиындап, яғни жол көлік оқиғаларының болу ықтималдығы артады. Сондықтан жауын салдарынан жол үстінде болатын көктайғақта жол қозға­лысы ережелерін қатаң сақтау қажет. Осы­ған орай полиция қызметкерлері Созақ ауда­ны ар­қылы өтетін «Ұланбел – Созақ – Екпінді», Бәй­дібек ауда­ны бойын­ша «Шаян – Шолақ­қор­ған» тасжолдары уақытша жабылғанын ескертті.

Өңір аумағындағы су тасқы­нының алдын алу мақсатында облыс әкімі Дархан Сатыбалды Сырдария өзені бойында орна­ласқан Отырар, Сауран аудандары мен Арыс қаласының аума­ғына аэровизуалды шолу жасап, өзен бойына жақын ор­наласқан елді мекендер мен су нысандарының жай-күйін ба­қылады. Төтенше жағдай депар­­таментінің басшыларымен кеңесіп, көктемгі су тасқынының алдын алу жұмыстарын кезекті рет пысықтады. Тексеру нәтижелері бойынша облыстағы су қой­малардың деңгейі қалыпты жағ­дайда екені анықталды.

Қазіргі таңда барлық су ны­санының жағдайы мен деңгейін бақылау мақсатында облыстық су тасқынына қарсы комиссия құрылған. Өңір басшысы жа­уаптыларға су қоймаларының деңгейі қалыпты жағдайда болса да, қауіпсіздік іс-шараларын күшейту жөнінде тапсырмалар берді. Ал «Көксарай» су рет­тегішінен тасталып жатқан 600 текше метр су кедергісіз өтіп жатыр. Қазіргі таңда ауа райының жылынуына байланысты сең бұзылып, төмен қарап еріп кетіп жатыр. Жауапты мекемелер өңірде жағдай қалыпты екенін мәлімдеді.

 

Түркістан облысы