«Өрлеуде» маңызды мәселе талқыланды

Қазіргі таңдағы еліміздегі өзгерістер, тұрақты дамудың жаңа стратегиялық бағыттары және қоғамның ашықтығы, оның жедел ақпараттануы, қарқындылығы білім беруге қойылатын талаптарды түбегейлі өзгертті. Білім беруді жаңарту ұстаздардың жауапкершілікті түсінуі мен кәсіби деңгейіне және білім беру үдерісіндегі көптеген мәселелерді шешуге қосқан үлесіне байланысты. Сонымен бірге бұл үрдіс оқушылардың білімін ғана емес, оны өмірде қолдану дағдыларын, атап айтқанда, функционалдық сауаттылығын дамытады. Оқушылардың функционалдық дамуы туралы мәселе алғаш рет Ел­басының 2012 жылғы 27 қаң­­­­­тар­дағы Қазақстан халқына «Әлеу­­меттік-экономикалық жаң­ғырту – Қазақстанның дамуының негізгі бағыты» Жолдауында көте­рілген болатын. Онда осы мәселе бойын­ша бесжылдық Ұлттық іс-қимыл жоспарын қабылдау туралы нақты тапсырма қойылды. Жолдау­ға байланысты Қазақстан Рес­пуб­ликасы Үкіметінің 2012 жылғы 25 маусымдағы қау­лы­сы­мен «Оқу­шылардың функ­цио­нал­дық сауат­тылығын дамыту жөнін­дегі 2012-2016 жылдарға арнал­ған Ұлттық іс-қимыл жоспары» қабылданды. Функционалдық сауатты­лық­тың жалпы бағыты ретінде жалпы білім беру мектеп­терін­дегі азаматтардың интел­лек­туалдық, рухани және дене дамуы, олардың білімін әлемдегі жылдам өзгеріс жағдайында әлеуметтік жағдайға бейімдеу Қазақстан Республикасында білім беруді дамытудың 2011-2020 жылдарға арналған мемлекеттік бағдарламасында атап көрсетілген. Ұлттық жоспарды іске асыру мемлекеттік органдардың, кә­сіби қоғамдастықтардың, үкі­мет­­­тік емес ұйымдардың, білім беру ұйымдарының, педагог кадр­лардың біліктілігін арт­тыру институттарының, ата-аналар­дың қызметін үйлестіруді қажет етеді. Осыған орай жақында «Өрлеу» біліктілікті арттыру ұлттық орталығы» АҚ Оңтүстік Қазақстан облысы бойынша филиалында «Функционалдық сауаттылық – сапалы білім берудің кепілі» тақы­рыбында республикалық ғылы­ми-практикалық конференция өткізілді. Оның жұмысына «Өр­леу» БАҰО» АҚ директорлар кеңесі­нің төрағасы М.Әбенов, басқар­ма төрағасының орынбасары, профессор Ж.Қараев, қоғам филиал­дарының директорлары, білім саласының ғалымдары, жоғары оқу орындары, колледж және білім беру ұйымдарының басшылары, біліктілікті арттыру институттарының оқытушылары қатысып, пікір алмасты. «Өрлеу» БАҰО» АҚ Оңтүстік Қазақстан облысы бойынша фи­лиалы педагогикалық қыз­мет­керлердің біліктілігін арттыру институтында отандық және шет­елдік тәжірибелерді өңір мек­тептеріне таратуға қабілетті, білікті де білімді мамандардың үлкен әлеуеті шоғырланып келеді. Сонымен қатар, институт мемлекет белгілеген білім беруді дамытудың жаңа бағыттарын жүзеге асыруда. Атап айтқанда олар – жаңа мазмұндағы қысқа мерзімді біліктілікті арттыру курстары, Назарбаев зияткерлік мектептері мен Кембридж университеті бірігіп даярлаған деңгейлік бағ­дарламалар, Е-learning және Smart-­learning үдерістерін енгізу, халық­аралық ынтымақтастықты дамыту, әлемдік тәжірибе негізінде институт қызметкерлерінің біліктілігін арттыру, ағылшын тілін ерте жастан оқыту, көптілді тұлғаны қалыптастыру болып отыр. Пленарлық мәжілісте оқу жы­­лының қорытындысы бойынша облыстың білім үздіктерін марапаттау рәсімі өтті. Конференция жұмысы дөңгелек үстелмен, ше­берлік сыныптармен және тренинг­термен жалғасты. Мұнда оқушы­лардың функционалдық сауат­ты­лығын қалыптастыру мен дамы­туға бағытталған білім үрдісін ұйым­дастыру қағидаттарын және зама­науи білім технологияларын тал­қылауға ерекше назар аударылды. Сонымен, алқалы жиынға қатысу­шылар үлкен сенім арқалап қайтты. Лаура ИСКАКОВА, «Өрлеу» БАҰО» АҚ Оңтүстік Қазақстан облысы бойынша филиалының директоры.