Сенаттың Әлеуметтік-мәдени даму және ғылым комитетінің төрағасы Нұртөре Жүсіптің айтуынша, Әлеуметтік кодекс – бұл елдегі әлеуметтік саясатты жақсарту жолындағы тағы бір қадам болып отыр. Сенатор құжатта халықаралық деңгейде мойындалған және белгіленген жаңалықтар қамтылғанын атап өтті.
«Әлеуметтік кодекс жобасында ана мен баланы ұлттық демографиялық саясаттың факторы ретінде қолдау тетіктері, еңбек нарығын дамытуды ұйымдастыру және жұмысқа орналасуға көмек көрсету, аз қамтылған отбасылардың материалдық әл-ауқатын арттыруға көмектесу, арнаулы әлеуметтік қызметтер жүйесін жетілдіру, мүгедек адамдарды әлеуметтік қорғау бойынша жаңа шаралар көзделген», деді сенатор.
Еңбек және халықты әлеуметтік қорғау министрі Тамара Дүйсенова кодекстегі негізгі жаңалықтар туралы шағын ақпарат берді. Олардың қатарында әлеуметтік қызмет көрсету жүйесін жетілдіру, мемлекеттік қолдаудың жаңа түрлері, әлеуметтік сақтандыру мен зейнетақылардың жақсартылған жүйесі және басқалары бар.
Таныстыру барысында кодексте қазіргі уақытта икемді жұмыспен қамту, жас жұмыс күшінің көбеюі, әлеуметтік қамсыздандыру жүйесіне өзін-өзі жұмыспен қамтығандардың толық қатыспау мәселелері бар екенін атап өтті.
Жалпы алғанда Кодекс жобасында Қазақстанның әлеуметтік саласын нығайту мен дамыту үшін базалық жағдайлар жасауға бағытталған 50-ден астам заңға өзгерістер мен толықтырулар көзделген.
