Коллажды жасаған Зәуреш Смағұл, «ЕQ»
Өңірдегі «сақалды құрылыстардың» бірі – Құмжарған мектебі 2017 жылы басталып, 2019 жылдың бірінші жартысында пайдалануға берілуге тиіс еді. Әуелде мемлекеттік сатып алу рәсімі бойынша анықталған бас мердігер – «Сауран Инжиниринг» ЖШС. Мектеп құрылысына жергілікті бюджеттен 294 млн 857 мың теңге бөлінді. Алайда 2020 жылдың 16 қарашасындағы Ақтөбе қалалық сотының шешіміне сәйкес аталған мердігер жосықсыз жеткізуші деп танылды. Осылайша, мектептің жыры алты жылға созылды. Мердігер тұрақтамай, субмердігердің бірі келіп, бірі кетті. Құрылыс материалдарының күрт қымбаттауы білім ошағының дер кезінде аяқталмауының тағы бір себебіне айналды.
Биыл ақпанның алғашқы күні балалары 1979 жылы салынған ескі мектептен жаңа ғимаратқа көшкенде ауыл тұрғындары ерекше қуанып, салтанатты ашылу рәсіміне бірі қалмай келді. Елдің қуанышына Ақтөбе облысының әкімі Ералы Тоғжанов, Сыбайлас жемқорлыққа қарсы қызмет департаменті басшысының міндетін атқарушы Есқали Саламатов ортақтасты.
– Мемлекет басшысы жаңа мерзімдегі бірінші Жарлығында ауылдық аумақтарды дамытуға ерекше назар аударды. Осы тапсырманы орындау мақсатында 2022 жылдың соңында Ақтөбе облысы ауыл тұрғындарының әл-ауқатын арттыруға арналған «Ауыл аманаты» жобасы басталды. Ең бірінші кезекте жұмыссыз, әлеуметтік осал топтағы азаматтардың кәсіптерін ұйымдастырып, тауарлы, қаржылай несие алуына 6 млрд теңгеден астам қаражат бөлінді. Мұнымен бірге ауылдағы шағын жинақты мектеп оқушыларының білім сапасын көтеру мақсатында «БілімALL» жобасын бастадық. 10 мың ауыл баласына Ақтөбе қаласының үздік мұғалімдері математика, физика, химия, биология, ағылшын тілі пәні бойынша онлайн дәрістер өткізеді. «БілімALL» жобасына Құмжарған негізгі мектебінің 50 оқушысы қосылды, – деді Ералы Тоғжанов мектептің ашылу рәсімінде.
Есімі белгісіз жемқордан Құмжарған мектебіне қаржы өндіріп берген сыбайлас жемқорлыққа қарсы күрес қызметі өңірдегі бірнеше күрделі мәселені анықтапты.
– Білім беру ұйымдарының қызметіне байланысты тұрғындар арасында сауалнама өткізіп, жалпы мониторинг жүргіздік. Оның қорытындысы бойынша халықтың ренішін туғызатын және өңірдің әлеуметтік дамуына кері әсер ететін бірнеше себеп анықталды. Дер кезінде аяқталмай жатқан мектеп құрылыстары да біз анықтаған артқа тартушы факторлардың бірі. Жергілікті атқарушылық билік пен сыбайлас жемқорлыққа қарсы қызметтің бірлескен шешімдері нәтижесінде Құмжарған мектебінің құрылысы аяқталды, – деді Е.Саламатов.
Айта кету керек, қазіргі уақытта Ақтөбе облысының мектептерінде 17 мың 844 оқушыға орын тапшылығы байқалады.
Ақтөбе облысы
