АСТАНА. 18 маусым. Өткен түнде чемпионаттың екінші турының ойындары да басталды. Ол А тобындағы Бразилия – Мексика құрамалары арасындағы матчпен ашылды. Кездесуде біріншіліктегі екінші тең ойын жазылды. Сонымен бірге, мұнда алғаш рет 0:0 деген есеп тіркелді. Бұл туралы egeven.kz хабарлады.
Бразилия – Мексика 0:0.
17 маусым. Форталеза. «Кастелан» стадионы. 60 342 көрермен. Төреші - Джунейт Чакыр (Түркия).
Бразилия: Жулио Сезар, Дани Алвес, Тиаго Силва, Давид Луис, Марсело, Луис Густаво, Паулиньо, Рамирес (Бернард, 46), Оскар (Виллиан, 84), Неймар, Фред (Жо, 68).
Мексика: Гильермо Очоа, Пауль Агилар, Франциско Родригес, Рафаэль Маркес, Мигель Лайюн, Эктор Эррера (Марко Фабиан, 76), Андрес Гуардадо, Хосе Васкес, Джовани дос Сантос (Рауль Хименес, 84), Орибе Перальта (Хавьер Эрнандес, 73).
Ескертулер: Рамирес (45), Тиаго Силва (79) – Пауль Агилар (59), Хосе Васкес (62).
Ойында бразилиялықтар мексикалықтардың қарсылығын баса алмай, мундиальдағы бірінші мүлт кетерін жасап алды. Бірақ бұл олар үшін оншалықты бір тағдыр шешерлік оқиға болған жоқ. Себебі, пентакампеондар ендігі қалған соңғы турда топтың аутсайдері – Камерунмен ұшырасады. Екі команда да осы тең ойынның нәтижесінде төрт ұпай жинады. Матч барысында Сколаридің шәкірттері допқа көбірек егелік етіп, территориялық басымдық пен инициативаға ие болды. Ал Эррераның командасы бүкіл ойын бойына қорғанысқа айрықша көңіл бөліп, қатаң тәртіп ұстанды.
Мексикалықтар санаулы ғана ойыншыларының қатысуларымен оқта-текте ғана қарсы шабуылдарға шығып тұрды. Олардың мұндағы негізгі қарулары алыстан соққы жасау болды. Бұл соққылардың дені қақпа жанынан ұшып өтіп, пәлендей қауіп төндіре қойған жоқ. Ал қаншама мүмкіндіктен нәтиже шығара алмай, голкипер Гильермо Очоаның «жеміне» айнала берген «селесао» шабуылшылары бұған өздерін ғана кінәлаулары керек. Сколари кейін алаңға шығарған үш футболшы да шабуылды күшейте түсуге үлес қосты. Бірақ бұлардың барлығы да қақпа құлпын ашуға дәрменсіздік танытты.
Әділдігін айтқанда, Бразилия құрамасы гол соғуға қаншама мүмкіндік алғанына қарамастан, тұтастай алғанда, жоғары деңгейдегі ойын көрсете алмады. Бұл жағынан оның ойыны маусымашар матчтағыдан жоғары бола алған жоқ. Ал мексикалықтар қорғанысқа қатты көңіл бөлулері мен қақпашысының қателіксіз ойынының арқасында тең нәтижеге қол жеткізді.
Дамир Қожамқұл.
Дереккөз: egemen.kz.
Фото: Sportbox.ru.
