АСТАНА. 18 маусым. Бүгін 19 маусымға қараған түні В тобындағы командалар да екінші турдың ойындарына кірісті. Онда Австралия және Голландия құрамалары кездесті. Кездесу 3:2 есебімен «Қызғалдақтар елі» футболшыларының пайдасына шешілді. Бұл туралы egeven.kz хабарлады.
Австралия – Голландия 2:3 (1:1).
18 маусым. Порту-Алегри. «Бейра-Рио» стадионы. 42 877 көрермен. Төреші - Джамель Хаймуди (Алжир).
Австралия: Мэттью Райан, Райан Макгован, Алекс Уилкинсон, Мэттью Шпиранович, Джейсон Дэвидсон, Миле Единак, Мэтт Маккей, Мэттью Леки, Марк Брешиано (Оливер Бозанич, 51), Томми Оур (Адам Таггарт, 77), Тим Кэхилл (Бен Хэллоран, 69).
Голландия: Яспер Силессен, Дэрил Янмат, Стефан де Врей, Рон Влаар, Бруно Мартинс (Мемфис Депай, 45+3), Дэйли Блинд, Найджел де Йонг, Уэсли Снейдер, Джонатан де Гузман (Джорджино Вейналдум, 78), Арьен Роббен, Робин ван Перси (Джермейн Ленс, 87).
Голдар: Арьен Роббен (20), Тим Кэхилл (21), Миле Единак (54, пенальти), Робин ван Перси (58), Мемфис Депай (68).
Ескертулер: Тим Кэхилл (43) – Робин ван Перси (47).
Бүгін Голландия құрамасы Бразилия чемпионатындағы қатарынан екінші жеңісіне жетті. Ол өзінің бірінші ойынында әлем чемпионы – Испания командасын 5:1 етіп тас-талқан етіп ұтып, айды аспаннан шығарған болса, Австралия жасағымен өткен екінші матчында өзі жеңіліп, тағы бір сенсацияға ұрынып қала жаздады. Мұндағы жеңіс оған қиынырақ соқты.
Расында да бірінші таймның орта тұсында есеп ашқан ван Гаалдың жігіттері артынша өздеріне жауап доп өткізіп алды. Осы есеп тайм соңына дейін берді.
Голландиялықтар екінші таймға тактикалық схемасын өзгертіп ойнады. Олардың үйреншікті 4-3-3 жүйесі түптің түбінде тиісті нәтиже де әкелді. Рас, басында пенальтиден гол салған австралиялықтар алға шықты. Ал айып добы қапталдан Бозанич тастаған допты Янмат қолымен ұстап алуына байланысты белгіленді. Оны Миле Единак қатты ұрып түсірді. Осы кезде кезекті сенсация тууы мүмкін екені туралы сөз қозғалды.
Алайда, бұл дүрбелеңді Голландия ойыншылары тез баса білді. Арада бар-жоғы 4 минут өткенде, Ван Перси офсайд шегінде тұрған сәтінде қақпаға көктей өтіп, гол салды – 2:2!
Осыдан кейін қарсыластар біршама уақыт жайбарақат қалыпқа көшті. Ал фаворит саналған голландиялықтар пәлендей артықшылық көрсеткен жоқ. Онымен текетіреске түскен Австралия футболшылары оған барынша лайықты көрінді. Кенет ойын қайтадан қызып жүре берді. Оны 66-минутта австралиялықтар көтерді. Сол сәтте Де Врей өз қақпасы маңында доптан айрылып қалды. Оны іліп ала кеткен Оур қақпаға ұрып жатпады, оны алыс бұрышқа жөнелтті. Сол жерде оны торға ешкім бағыттай алмады. Арал-мемлекет құрамасының бұл ашық-шашықтығын голландиялықтар кешірмеді. Қарсы шабуылға шыққан олар қолайлы сәтте тағы бір гол салып, есепті 3:2-ге жеткізді.
Дамир Қожамқұл.
Дереккөз: Чемпионат.Ру.
Фото: Sportbox.ru.
