Бұндай семинар Астанада алғаш рет. Бұл еуропалық футбол қауымдастықтары одағының мүшелері үшін өте беделді курс және көп елдер оны өздерінде өткізуге ынталы. Қазақстан да УЕФА-ға бірнеше рет өтініш берген болатын. Орайы осы жылға келді.
«Бізге бірнеше жылдан бері Қазақстанда өткізуге өтінім түсіп жүр. ҚФФ жаңа президенті Әділет Барменқұловтың арқасында биыл өткізіп отырмыз», деді УЕФА-ның ұлттық ассоцацияларды дамыту жөніндегі директоры Тьерри Фавр.
Қазіргі уақытта бүкіл ел бойынша барлық деңгейлерде үш мың жоғары білікті маман қажет. Ал федерацияның мәліметтері бойынша олардың саны 300-ге ғана жетеді.
UEFA CFM курсы тоғыз айға созылады. Ол 350 сағаттық сабақты құрайтын алты негізгі модульден тұрады. Кіріспе модуль Астанада өтеді. Тренинг футбол клубтары мен қауымдастықтарды басқарудың барлық салаларын қамтиды: Қаржы, маркетинг, коммуникация, жедел басқару, стратегиялық даму және адами ресурстар. Баяндамашылар УЕФА, сондай-ақ Швейцария, Шотландия, Италия, Франция және Англия университеттерінің жетекші сарапшылары.
