Тараптар сауда, инвестиция тарту, көлік және логистика, ауыл шаруашылығы, цифрландыру, білім беру, төмен көміртекті даму және т. б. салалардағы кең ауқымды мәселелерді талқылады.
Премьер-министр Қазақстан Финляндияны Солтүстік Еуропа өңіріндегі және халықаралық ұйымдардағы негізгі әріптестердің бірі деп танитынын атап өтті. Осыған байланысты Үкімет барлық бағыттар бойынша өзара тиімді ынтымақтастықты тереңдетуге және нығайтуға ниетті.
«Біз инвестициялық ынтымақтастықты арттыру мен өзара сауда көлемін ұлғайтудың зор мүмкіндіктерін көріп отырмыз. Осы орайда Сауда-экономикалық ынтымақтастық жөніндегі үкіметаралық комиссия маңызды рөл атқарады, ол екі елдің бизнес-топтары арасындағы диалог үшін тиімді платформа болып отыр», деді Әлихан Смайылов.
Осы тұрғыда Премьер-министр Финляндияның Астанадағы елшілігі жанындағы жаңа визалық орталықтың ашылуын, сондай-ақ қазақстандық және фин компанияларының қатысуымен дөңгелек үстел өткізу жоспарларын қолдады.
Сонымен қатар министр фин бизнесінің қазақстандық нарыққа деген қызығушылығының артқанын, сондай-ақ салалық ынтымақтастықты, атап айтқанда, цифрландыру және білім беру салаларындағы ынтымақтастықты нығайту бойынша әлеуеттің жоғары екеніне тоқталды.
Кездесу қорытындысы бойынша тараптар қазақ-фин әріптестігін кеңейту үшін белсенді түрде бірлескен жұмысты жалғастыруға дайын екендерін растады.
