Алматыдағы халықаралық ұйымдар кеңсесінің ғимаратына «UN Plaza» атауын беру рәсімі өтті. Бұл ғимараттың ресми инаугурациясы 2019 жылдың мамыр айында Президент Қасым-Жомарт Тоқаевтың қатысуымен өтті. Бүгінгі таңда Алматы қаласындағы БҰҰ ғимаратында штаттық саны 120 адамнан асатын 18 агенттік орналасқан.
БҰҰ өкілдерімен кездесу барысында М. Тілеуберді БҰҰ-ның Қазақстанда болғанына 30 жыл толуымен құттықтап, осы кезеңдегі еліміз бен жаһандық ұйым арасындағы өзара іс-қимылдың жоғары деңгейін атап өтті. Қазақстанның Алматыда Орталық Азия мен Ауғанстан үшін орнықты даму мақсаттары бойынша БҰҰ Өңірлік орталығын құру жөніндегі бастамасына ерекше назар аударылды. «Мультилатерализмге берік сенім мен міндеттеме, болжамды және сындарлы сыртқы саясат Қазақстан үшін басты басымдық. Өңірлік орталықтың қызметі БҰҰ өңірлік даму жүйесін іске асыру шеңберінде тиімді құрал болады», деді министр.
Сонымен қатар ол кездесуге қатысушыларды Қазақстандағы саяси реформалардың іске асырылу барысы және 2023 жылғы 19 наурызда жоспарланған алдағы парламенттік сайлауға дайындық туралы хабардар етті.
Өз кезегінде Алматыдағы БҰҰ мен дипломатиялық корпус өкілдері ел басшылығының «Жаңа және Әділетті Қазақстанды» құруға бағытталған күш-жігерін жоғары бағалады. Сондай-ақ Алматыда қызметті жүзеге асыру үшін қолайлы жағдайды қамтамасыз етуде көрсеткен қолдауы үшін Үкімет пен әкімдікке алғыс білдірді.
