Қызылордада алғаш рет тағайындалған судьялар таныстырылды

АСТАНА. 24 маусым. Қызылорда облыстық сот төрағасы Нұрлан Қайырбековтің және облыс соттары судьяларының қатысуымен Президенттің 2014 жылдың 17 маусымындағы №839 Жарлығымен алғаш рет тағайындалған судьяларды ұжыммен таныстыру рәсімі өтті. Бұл туралы «ҚазАқпарат» хабарлады. Қызылорда облысында онға жуық сот маманы Президент Жарлығымен судья лауазымына лайық деп танылды. Нақтылай айтқанда, облыстық сот кеңсесі бақылау және құжат айналымы бөлімінің басшысы қызметінде болған Г.Тыныштықбаева Қазалы аудандық сотының судьясы, Қызылорда облыстық сотының бас маманы қызметін атқарған Ә.Түбекбаева Шиелі аудандық сотының судьясы, облыстық сот кеңсесі персоналды басқару бөлімінің басшысы болған Л.Әлібекова Қармақшы аудандық сотының судьясы қызметіне бекітілді. Бұдан бөлек, аудандық соттарда қызмет атқарып келген Қызылорда қаласының №2 сотының кеңсе меңгерушісі А.Әбілқайысқызы Қызылорда облысы мамандандырылған ауданаралық экономикалық сотының судьясы, Қызылорда мамандандырылған ауданаралық қылмыстық істер жөніндегі соттың бас маманы-сот отырысының хатшысы Б.Жанабаев Қызылорда қаласының №2 сотының судьясы, облыстық сот кеңсесінің бас маманы Ж.Жолдасов Сырдария аудандық сотының судьясы, Қызылорда қалалық сотының бас маманы-сот отырысының хатшысы Т.Темірбаев Жалағаш аудандық сотының судьясы лауазымына тағайындалды. Сол сияқты Э.Ахметова, А.Сұлтанбеков, М.Исахановалар Қызылорда қалалық сотының судьясы, ал Н.Еламанов Қызылорда облысының мамандандырылған ауданаралық экономикалық сотының судьясы болды. Облыстық соттың төрағасы Н.Қайырбеков жаңадан тағайындалған судьяларға сәттілік тіледі. Жолдыбай Базар. Дереккөз: «ҚазАқпарат». Фото: kzl.sud.kz.