Әйелдер кәсіпкерлігінің дамуында басты рөлді мемлекеттік бағдарламалар, қоғамдық ұйымдар мен ірі бизнес-компаниялар атқарады.
Статистика экономикадағы ШОБ-тың, өзін жұмыспен қамтығандар санының, шағын және орта бизнестің жұмыс істеп жатқан және қайта тіркелген субъектілері санының өсу үлесін растап отыр. Осылайша, ҚР Ұлттық экономика министрлігінің мәліметтері бойынша республиканың ІЖӨ-дегі ШОБ үлесінің өсімі соңғы жылда 16 пайыздық пунктті құрап, 2022 жылы 33,5%-ға жеткен. Жұмыспен қамтылғандар саны 35%-ға артып, 3,5 млн адамды құрады, олардың 31%-ы немесе 1 миллионын әйел адамдар құрайды. Жұмыс істеп жатқан ШОБ кәсіпорындар саны 2012 жылдан бастап 44%-ға артып, 1,4 млн адамнан асқан. Әйел адамдар шағын және орта кәсіпкерліктің 43,5% субъектісіне басшылық етіп отыр.
«Әйелдер кәсіпкерлігі тақырыбын көптеген алаңдар қозғағанына, әрі бүгінгі конференция және Қазақстанның Ауыл әйелдері форумы секілді іс-шаралардың өткізілуіне айтарлықтай деңгейде көмектескеніне аса қуаныштымыз. Үкіметтің, қоғамның және жекеменшік сектордың бастамаларын біріктіре отырып, әйелдердің экономикалық мүмкіндіктерін ынталандыру, қамтамасыз ету және кеңейту жобалары жалғасын табуы тиіс», деді конференция модераторы және Қазақстанның Ауыл әйелдері форумын ұйымдастыру комитетінің төрайымы Майра Айсина.
Ұлттық экономика, Еңбек және халықты әлеуметтік қорғау, Ауыл шаруашылығы министрліктерінің өкілдері ауыл адамдарының өмір сүру сапасын және олардың табыс деңгейін арттыруға тиісті жағдай жасауға арналған мемлекеттік қолдау көрсету шаралары туралы өзекті мәліметтерімен бөлісті. Қолдау көрсетудің негізгі құралдары – пайыздық мөлшерлемені субсидиялау, кәсіпкерлердің несиелеріне кепілдік беру және мемлекеттік гранттар беру, сонымен қатар реттеушілік саясатты одан әрі жетілдіру.
«Әйелдер кәсіпкерлігінің өсуі мемлекет тарапынан қолдау көрсетуші шаралармен әрі қоғамдық ұйымдар мен бизнестің белсенді рөлімен тығыз байланысты», деді «Әлеуметтік динамика» қоғамдық қорының директоры және «Белестер» әйелдер кәсіпкерлігін дамыту әлеуметтік жобасының ұйымдастырушысы Елена Ожго.
Қазақстанда бизнеске әйелдердің қатысуы дамып жатқанына қарамастан, әйелдер бизнес бастауда да, оны басқаруда да, әсіресе бастапқы кезеңдерде көптеген қиындықтарға тап болады. Басқасымен қатар, бұл қаржыландырудың жетіспеушілігімен, сонымен қатар ауылды жерлерде қажетті дағдылар мен ақпараттың жетіспеушілігінен болып отыр. Бүгінгі конференцияны ұйымдастырушылардың пікірінше, аталмыш проблемаларды шешудің жолы – сапалы нетворкинг, яғни бизнесті ұйымдастыруда қол жеткізудің қарапайымдылығы, өз жобаларын қаржыландыруға мүмкіндік алу.
«Қазақстанда жеке бизнес пен үкіметтік емес ұйымдар тарапынан әйелдер кәсіпкерлігін қолдау бойынша кемінде бес ірі жоба бар. Олардың ішіндегі ең ұзақ мерзімдісі - «Белестер» жобасы 10 жыл ішінде кәсіпкерлік курстарында еліміздің қалалары мен ауылдарында 62 мыңнан астам әйелді дайындады. Жоба аясында бизнесті дамытуға 117 шағын грант берілді. 2023 жылы тағы 20 грант беру және кемінде 15 мың әйелді оқыту жоспарланып отыр. Оқыту ерлер үшін де қолжетімді, бірақ гранттар конкурсына тек әйелдер ғана қатыса алады», деді Қазақстандағы «Белестер» жобасын қаржыландыратын халықаралық қайырымдылық қорының өкілі Александра Аккирман.
