6 ақпанда Түркияның оңтүстік-шығысында және Сирияның солтүстігінде екі мәрте үлкен жер сілкінісі болды. 448 мыңнан астам адам эвакуацияланды. 20 мыңнан астам ғимараттың қираған орнында іздестіру-құтқару жұмыстары жүргізілді.
45-тен астам мемлекет жапа шеккендерге қол ұшын созды. Апаттың салдарын жою үшін қаржылық көмек көрсетті. Қазақстан да жағдайға бей-жай қарамай, апат аймағына шұғыл түрде құтқарушылар мен дәрігерлерді, сонымен қатар авариялық-құтқару жабдықтарының 150-ге жуық түрін жіберді.
– Мемлекет басшысының тапсырмасымен осындай сын сағатта Ұлттық ұланның әскери қызметшілері де жер сілкінісі салдарын жою жұмыстарына қатысып, гуманитарлық жүктерді тасымалдады. Ұшқыштар Сирияға 4 рейс, Түркияға 2 рейс жасады, – деді Ішкі істер министрі Марат Ахметжанов.
Опаттан ойран болып, зілзаладан жапа шеккендерге қазақ елінің атынан көмекке аттанғандардың бірі Берікболсын Хабиболла. Ол – 3656 әскери бөлімінің литерлік авиациялық жасағының кеме командирі. «Жауынгерлік ерлігі үшін» медалімен марапатталған ұландық апатты жерге ұшу мен қону кезінде қиындықтардың болғанын айтады.
– Сирия мемлекетіне ұшу бұл біздің онда бірінші рет ұшуымыз болғандықтан экипаж үшін қиынға түсті. Онда GPS-навигация жұмыс істеген жоқ. Бұл ұшақтардың толық жұмыс істеуіне кедергі келтіреді. Радиобайланыспен де қиындықтар туындады. Жер сілкінісі кезінде Түркия мен Сирия елдерінің радиостанцияларына үлкен зақым келген, – деді ұландық.
Оның әріптесі Құрманғали Топанов ІІ дәрежелі «Айбын» орденімен марапатталды.
– Жалпы негізгі қызметіміз осы. Сондықтан барлық қиындықтарды еңсере білдік. Бәріміз әскери адам болған соң, жүктелген міндетті мүлтіксіз орындауға тырысамыз, – деді ҚР Ұлттық ұланының 3656 әскери бөлімінің авиациялық жасағының кеме командирі Құрманғали Топанов.
Ерлік – елге мұра, ұрпаққа – үлгі. Әскери борышын абыроймен атқарып келген жауынгерлерге ведомство басшылығы қызметте табыс тіледі.
