Елорда әкімі Алматыда өткен әлем чемпионатында жылдам шахматтан (рапид) күміс жүлде алған шахматшы Динара Сәдуақасованы жарқын жеңісімен құттықтады.
Динара Сәдуақасова Астана қаласының әкіміне қолдау көрсеткені үшін алғысын айтып, спорттағы мансабына байланысты алдағы жоспарымен бөлісті.
Өз кезегінде Жеңіс Қасымбек әлемдік шахмат додаларында ел намысын алдағы уақытта да лайықты деңгейде қорғай беретініне сенім білдіріп, тек биіктен көрініп, жеңіске жетуіне тілектестік білдірді.
Айта кетсек, бүгін Динара Сәдуақасова Астана шахмат федерациясының құрметті президенті болып сайланды. Ол бұл туралы өзінің Facebook желісіндегі парақшасында хабарлады.
«Осы мақсатта мен шахматты одан әрі насихаттап, дамытуға, маған артқан сенімдеріңіз бен үміттеріңізді ақтауға тырысамын. ФИДЕ спорт комиссиясында тәжірибесі бар ЮНИСЕФ-тің ізгі елшісі ретінде өз білімім мен энергиямды шахматтың көркеюіне жұмсаймын», деп жазды Динара Сәдуақасова.
