Бүгін Сырым ауданындағы Өлеңті ауылында су басқан екі үйден алты адам қауіпсіз жерге көшірілді. Мұндағы басқа да тұрғын үйлерді су басу қаупі сақталады.
⠀
13 наурызда БҚО Төтенше жағдайлар департаментінің басшысы Ернұр Өтегенов сағат 13:00-де БҚО Бөрлі ауданы, Ақбұлақ ауылында (Ақсай қаласынан 25 шақырым жерде) еріген судың арнасынан асып кеткенін хабарлады.
Қазіргі уақытта Ақбұлақ ауылындағы Ақбұлақ көшесі мен Желтоқсанды су басқан. Алдын ала мәлімет бойынша, 11 үйді су басып, 44 адам қауіпсіз жерге көшірілді.
Тұрғын үйлерді су басқан жерде Төтенше жағдайлар департаментінің жеке құрамының 40 адамы, бес техника, үш мотопомпа, жергілікті әкімдіктердің қызметкерлері жұмыс істеп жатыр. Бөгет жарылған жерге 200 құм салынған қап төселіп, 10 тонна құм дайындалған.
⠀
Ернұр Өтегеновтың айтуынша, облыстағы тағы бір елді мекенде су басқан үйлерден адамдарды көшіру жұмыстары жүргізілген.
Барлық адамдар туыстарының үйіне орналастырылды. Жеке қосалқы шаруашылықтағы мал – 12 бас ірі қара, 30 ұсақ мал көрші аулаларға таратылады.
⠀
«Өлеңті ауылындағы үйлердегі еріген су іргетастың үстіне көтерілді, қазіргі уақытта оның азаюы байқалады. Екі үйдің қабырғалары саман болғандықтан жағдай қиындады», дейді облыстық төтенше жағдайлар департаментінің басшысы.
⠀
БҚО әкімінің орынбасары Ержан Балтаевтың айтуынша, бұл өңірде бұрын 1979 және 1993 жылдары осындай табиғи апат болған. Бұған үш фактор: күзгі жауын-шашын, топырақтың қатуы және қалың қардың еруі әсер етеді.
