Маңғыстау облысында миллиондаған қаржы қолды болған

АҚТАУ. 26 маусым. Маңғыстау облысының Мұнайлы ауданында білім беру нысандарының құрылысына бөлінген миллиондаған қаржы жоқ болып шықты. Бұл туралы egemen.kz тілшісі хабарлады. Аталған жағдаятқа байланысты қаржы полициясы аудандық сәулет және құрылыс бөлімінің басшысы мен бірқатар қызметкердің және жеке серіктестік өкілдерінің үстінен қылмыстық іс қозғады. Күдіктілер іс жүзінде атқарылмаған жұмыстарды «орындалды» деп, ел қазынасынан бөлінген 38 миллион теңгені жымқырған. Дәлірегі, Басқұдық ауылындағы мектепті салуға қомақты қаржы бөлінгенімен, оның барлығы өз мақсатына жұмсалмаған. Облыстық қаржы полициясының баспасөз хатшысы Нұргүл Мұқатай: «Қазір сеніп тапсырылған бюджет қаржысын талан-таражға салды деген шенеуніктердің үстінен Қылмыстық кодекстің 176-бабы 3-тармағы бойынша іс қозғалып, тергеу амалдары басталды», – деді. Гүлайым Шынтемірқызы. Дереккөз: egemen.kz. Фото: «24kz».