Көрменің мақсаты – келушілерді испан мәдениетімен таныстырып, сондай-ақ Хосе Мария Каноның көркемдік шеберлігін көрсетіп және болашақ суретшілердің энкаустика техникасына деген қызығушылығын ояту.
Іс-шараның ашылуында Қазақстандағы Испания корольдігінің Төтенше және өкілетті елшісі Хорхе Урбиола Лопес де Монтенегро аталған көрменің екі елдің мәдени достығын одан әрі жақындата түсетінін жеткізді.
– Өнер – халықтарды жақындастырып, біріктіре түседі. Хосе Мария Кано – таза өнердің иесі. Оның шығармашылығында ай тақырыбы ерекше орын алған. Суретші қазақ халқының тазалығы мен шынайылығын жоғары бағалайды. Бір жағынан, бұл қасиет – екі халықтың достығын нығайтады. Бүгінгі шара – суретшінің екінші рет өтіп отырған көрмесі және соңғысы болмайды деп үміттенеміз, – деді елші.
Хосе Мария Кано – испан еліндегі айтулы суретшілердің бірі. Оның шығармашылығының өзгеше қырлары туралы Хьюго Рифкинд өз мақаласында: «Кано еңбектері тереңдігімен, тазалығымен дараланып тұрады. Сондықтан ол картиналарға қарағанда мүсінге көбірек ұқсайды», деп жазыпты.
Көрмеде көпшілікті суретшінің ерекше жұмыс істеу техникасы таңғалдырды. Материалға күйдірілген балауыз бояуларымен кескіндеу әдісі ежелгі Мысырда кеңірек қолданылған. Мысырлық қолөнершілердің балауызды қолдануы мумияларды бояғанда қанша уақыт өтсе де өзгермейтіндігінен туындапты. Осы мақсатта балауыз бояуға қосылған шайыр секілді рөл атқарған. Жазбаша деректерде энкаустика техникасы туралы мәліметтің аздығына қарамастан, бүгінге дейін оған қызығушылық азайған емес.
Айта кетейік, аталған көрме 27 наурызға дейін жалғасады.
