Инфографиканы жасаған Амангелді Қияс, «EQ»
Қазіргі күні төлем картасын қолданушылар арасында қолма-қол ақшасыз операциялардың ең танымал тәсілі – мобильді банкингті пайдалану. Былтыр операциялардың жалпы құрылымындағы онлайн транзакция үлесі 64,6%-ды құрады. Күн сайын әрбір азамат цифрлы банкинг арқылы орта есеппен 234,7 млрд теңгеден аса сомаға 15,2 миллионға жуық транзакция жүргізеді екен. Сонымен қатар алты жүз мыңға тарта кәсіпкердің 92,5 пайызы QR код арқылы төлем жүргізген.
Қазақстанда төлем карталарын 18 банк пен «Қазпочта» АҚ жүзеге асырады. 2023 жылдың ақпанындағы жағдай бойынша банктердің айналымдағы карталар саны – 65,9 млн. Кеңінен таралған дебеттік карталардың үлесі – 78,9%, несиелік карталар үлесі 17,9% болды. Қаңтар айында қазақстандық эмитенттердің төлем картасы арқылы жүргізілген транзакциялардың көлемі 10,3 трлн теңге, саны – 759,3 млн. Оның ішінде қолма-қол жасалмайтын транзакция саны 69,2%-ға артып, 8,8 трлн теңгені құраған. Төлем картаны қолданушылар арасында қолма-қол ақшаны алу операцияларының саны 17,3 млн бірлікті құрап, көлемі 16,3%-ға артқан. Қазақстан аумағында қолма-қол ақшасыз операциялардың негізгі үлесі мобильді банкинг пен POS-терминалдарға тиесілі болса, қолма-қол ақшаны беру операциялары банкоматтар арқылы іске асырылады.
Жақында тағы бір пластикалық карта айналымға енді. ВТБ (Қазақстан) клиенттері ресейлік «Мир» төлем жүйесінің пластикалық картасын ресімдей алады. Оны шығаруға өтінім беру еліміздің 17 өңіріндегі банктің кез келген бөлімшесінде қолжетімді.
Аталған банк өткен жылдың желтоқсан айынан бастап «Мир» төлем жүйесінің цифрлы картасын іске қосты. Енді банктің республикамыздағы клиенттері оның физикалық нұсқасын рәсімдей алады. Картаны өзіне-өзі қызмет көрсету құрылғылары мен банк кассалары, Qiwi және Yurta терминалдары арқылы, мобильді қосымшадағы есеп-айырысу шотынан, басқа «Мир» картасынан немесе деректемелер бойынша өзге банктің шотынан аудару арқылы толықтыруға болады.
