«Энфилде» «Ливерпульді» 5:2 есебімен жеңген Мадридтің «Реалы» «Сантьяго Бернабеуде» де өз жанкүйерлерін жерге қаратқан жоқ. Бұл бәсекенің тағдырын 79-минутта Карим Бензема соққан жалғыз гол шешті – 1:0. Сол секілді Неапольдің «Наполи» клубы да сырт алаңда «Айнтрахтан» 2:0 есебімен айласын асырған еді. Диего Армандо Марадона атындағы стадионда олар тіпті атойлады. Бірінші кезеңінің соңғы секундтарында Виктор Осимхен есеп ашса, үзілістен кейін дәл сол футболшы дубльдің авторы атанды. 64-минутта Петр Зелиньски 11 метрлік нүктеден нысананы дәл көздеді – 3:0. Естеріңізге сала кетейік, бұған дейін «Челси» мен «Манчестер Сити» (Англия), «Бенфика» (Португалия) мен «Милан» және «Интер» (Италия) мен «Бавария» (Германия) ширек финалға жолдама алған еді.
Ал Қазақстан чемпионатында үшінші тур өз мәресіне жетті. Соңғы екі кездесуде қонақтар басым түсті. Атап айтсақ, «Атырау» «Мақтааралды», ал «Қызылжар» «Оқжетпесті» жеңді. Бұл матчтардың екеуінде де 0:1 есебі тіркелді.
