Ерлер арасында 60 кило салмақ дәрежесінің қола медалін қазақтың қос балуаны өзара сарапқа салды. Олар – Мағжан Шамшиддин мен Қанат Сейілхан. Алғашқысы – көптеген дүбірлі додаға қатысқан сақа спортшы, екіншісі – жастар буынының өкілі. Бұл тартыста Мағжанның мерейі үстем болды. 81 кило салмақтағы Абылайхан Жұбаназар күміс медальді мойнына ілді. Ол канадалық Мохаб Эльнахас, польшалық Павел Дризималь, румыниялық Виктор Стерпу және грузилық Дмитрий Гочиладзені сан соқтырғанымен, финалда аустриялық Вахид Боршашвилиге есе жіберді. Әйелдер сайысында Әбиба Әбужақынова қола медаль иеленді. Шешуші тұста Әбиба испаниялық Абелинда Мартинесті ұтты.
Жарыстың соңғы күні Дидар Хамза мен Айдар Арапов (90 кило), Нұрлыбек Шархан мен Бекарыс Сәдуақас (100 кило), Ғалымжан Қырықбай мен Жамбыл Тұрғыналиев (+100 кило) және Кәмила Берліқаш пен Ақерке Рамазанова (+78 кило) татамиге шығады.
