– Ауылға кіреберісте ұзындығы 50 метрдей жол су астында қалды. Одан әрі 100 метр өткен соң, тағы 100-150 метр грейдерді су басып жатыр. Сол екі жер телегей-теңіз. Бұл енді қазір кеппейді. Жұрттың бәрі көлді айналып өтіп жатыр. Бірақ дала әлі дұрыс кебе қойған жоқ. Ауылдан шыққан көліктер әр жерде батып қалып жатыр, дейді Ахмет аулының тұрғыны Нариман Шорман.
Жол үстіндегі судың тереңдігі шамамен жарты метрге дейін барады. Мұнда қазір облыстық төтенше жағдай департаментінен келген 3 техника, 14 құтқарушы, жергілікті әкімдік бөлген 4 техника мен 30 адам жұмыс істеп жатыр. Оқиға орнына келген облыстық төтенше жағдай департаменті бастығының міндетін атқарушы, азаматтық қорғаныс полковнигі Азамат Орынбаевтың айтуына қарағанда, соңғы күндері Ұлы Жыланшық өзеніндегі су деңгейі біртіндеп төмендей бастаған. Сондықтан алдағы 4-5 күннің ішінде су төменде тұрған Ақкөлге қарай тартылып, көп кешікпей жол да ашылады деген болжам бар.
Ақкөлдің айналасы ақ теңізге айналғанымен елді мекендер мен шаруашылыққа қауіп төніп тұрған жоқ. Су тартылғанша жағдайды құтқарушы мамандар бақылап отыратын болады.
Ал жергілікті тұрғындар жол қатынасының қиындап кеткеніне қынжылғанымен, судың мол келгенін жақсылыққа балап отыр. Баяғыда теңіз болып толысып жататын Ақкөлдің суы жыл санап азайып, тартылып, жағадан ұзап кеткен еді. Бірнеше жылға созылған құрғақшылықтың салдарынан Ахмет ауылының айналасы да қу тақырға айналып, жұрт ауылдан 110 шақырымға дейін ұзап барып шөп шауып әкелетін жағдайға жеткен.
Облыс орталығынан 700 шақырым алыс, қиянда жатқан екі ауылдың тұрмыс-тіршілігі Ұлы Жыланшық өзені мен Ақкөлге қарап отыр. Көлдің жан-жағында бірнеше шаруа қожалықтары бар. Олар бағып отырған малдың қоңды-қоңсыз болуы да Ақкөлге байланысты.
– Мен осы ауылдың байырғы тұрғынымын. Жасым – 81-де. Мынау – Алланың көптен көрсеткен суы. Соңғы рет 2005 жылы келіп еді. Биыл тағы қаптап келіп, бүкіл ауыл қуанып жатыр. Әу баста сел басып кете ме деген қорқыныш болып еді. Қазір өзен тартып кетті. Бәрі орнына келейін деп тұр. Ешқандай қауіп жоқ. Біздің қамымызды ойлап облыстан келіп жатқан құтқарушыларға көп-көп рахмет. Бүгін аудан әкімі де келіп, жағдайды өз көзімен көріп кетті. Биыл жолдың су басқан тұсын биіктетіп, су өткізгіш құбыр саламыз деп уәде етті. Қазіргі жағдайымыз жаман емес. Тасыған су Ақкөлге құйылып жатыр. Бұл көл біздің ырысымыз. Ақкөлдің суы мол болса, балық та, шөп те мол болады, дейді Ахмет ауылының тұрғыны Қасқырбай Кенжеғұлов.
Облыстық төтенше жағдай департаментінің мәліметінше, қазіргі таңда облыс аумағындағы елді мекендерге су тасқынынан қауіп төніп тұрған жоқ. Оңтүстікке қарай орналасқан Арқалық, Амангелді, Жангелдин аудандарында қардың 95 пайызы еріген. Қызыл су өзен арналарына түсіп, су тасып жатыр. Бірақ судың деңгейі бірте-бірте төмендеп келеді.
Қостанай облысы
