Ұлттық қор есебінен экономиканың өсуін ынталандыру шаралары жүргізіледі

АСТАНА. 1 шілде. Ұлттық қордан бөлінген 1 триллион теңгенің көмегімен экономиканы сауықтырудың қосымша ынталандыру шаралары жүзеге асырылады. Бұл туралы «ҚазАқпарат» хабарлады. Орталық коммуникациялар қызметінде өткен брифингте Экономика және бюджеттік жоспарлау министрі Ерболат Досаев: «Мемлекет басшысының тапсырмасына сәйкес, Ұлттық қордан бөлінген 1 триллион теңге есебінен экономиканың өсуін қосымша ынталандыру шаралары қамтамасыз етілді. Биыл экономикалық өсуді қамтамасыз етуге 500 млрд. теңге бөлініп отыр. Оның ішінде шағын және орта бизнесті қолдауға 100 млрд. теңге, банк секторын сауықтыруға 250 млрд. теңге және индустриялық-инновациялық даму жобаларын іске асыруға 150 млрд. теңге жұмсалады», – деді. Экономика және бюджеттік жоспарлау министрінің сөзіне қарағанда, ұлттық қордан бөлінетін теңгені тиімді пайдалану үшін Үкімет бірқатар халықаралық қаржы ұйымдарымен келісімге келген. Ерболат Досаев: «Бірқатар халықаралық банктер экономиканың негізгі саласындағы инвестициялық жобалар мен басым бағдарламаларды бірлесе қаржыландыруды қамтамасыз етеді. Бірлесе қаржыландырудың жалпы мөлшері 7,5 млрд. долларға дейін жетеді», – деді. Жолдыбай Базар. Дереккөз: «ҚазАқпарат». Фото: remarka.kz.