АСТАНА. 1 шілде. Бүгін түнде Сан-Паулу қаласында Аргентина және Швейцария құрамалары арасында 1/8 финалдық ойын ойналды. Матчтың негізгі уақыты 0:0 есебімен тең аяқталды. Ал овертаймда аргентиналықтар 1:0 есебімен жеңіске жетті. Бұл туралы egemen.kz хабарлады.
Оңтүстік Америка құрлығының бұл құрамасы бұған дейінгі бірде-бір матчта өзін керемет ойындарымен көрсете алмады. Соған қарамастан, топта 9 ұпайды түгел алып, келесі кезеңге бірінші болып өтті. Ал еуропалықтар өзін қимыл-қозғалысын алдын ала болжау қиын жұмбақ команда ретінде танытты.
Аргентина – Швейцария 1:0. Негізгі уақыт - 0:0. Овертайм - 1:0.
1 шілде. Сан-Паулу. «Арена Коринтианс» стадионы. Төреші - Юнас Эрикссон (Швеция).
Аргентина: Серхио Ромеро, Пабло Сабалета, Эзекиэль Гарай, Маркос Рохо (Хосе Мария Басанта, 45), Федерико Фернандес, Хавьер Маскерано, Фернандо Гаго, Анхель ди Мария, Лионель Месси, Эзекиэль Лавесси, Гонсало Игуаин.
Швейцария: Диего Бенальо, Стефан Лихтштайнер, Йохан Джуру, Рикардо Родригес, Фабиан Шер, Валон Бехрами, Гекхан Инлер, Гранит Джака (Желсон Фернандес, 66), Жердан Шакири, Адмир Мехмеди (Блерим Джемайли, 113), Йосип Дрмич (Харис Сеферович, 82).
Гол: Анхель ди Мария (118).
Ескертулер: Маркос Рохо (90)
- Гранит Джака (36), Желсон Фернандес (73).
Чемпионаттың 1/8 финалында тағы да Кәрі құрлық пен Жаңа дүниенің, яғни Еуропа мен Оңтүстік Американың текетіресі орын алды. Ал бүгінгі екі құраманың бұған дейінгі өзара кездесулері санына келсек, Аргентинаның айқын басым болғанын байқауға болады. Олар 6 рет кездессе, соның 4-нде америкалықтар жеңіп, 2 ойында қарсыластар тең тарқасқан. Мұнда аргентиналықтар 14 гол соғып, бар-жоғы 3 доп жіберіп алған.
Қарсыластар кездесудің алғашқы 15 минутына дейін бір-бірлерінің қақпаларына пәлендей қауіп төндіре алмады. Дегенмен, бұл аралықта аргентиналықтардың аздаған артықшылығы байқалғаны да рас. Олар швейцариялықтардың қорғаныс шебін бірнеше рет бұзып өтті. Еуропалықтар осыдан кейін ғана қарсы алаң бетіне қарай шолғындап бара бастады.
Бұған дейін болжанғандай, Аргентина бірінші таймда кездесудің фавориті рөлінде көрінді. Олар допқа да көбірек егелік етті, шабуылды да артығырақ жасады. Бірақ Швейцария футболшыларының сирек жасаған қарсы шабуылдары қауіптірек бола түсті. Таймның соңында олар екі рет гол соғу сәтінде тұрды. Алғашында 39-минутта олар қауырт жорыққа шықты. Оң қапталдан Йосип Дрмичке пас тасталды. Қақпашы Серхио Ромеро оны қағып алуға ұмтылды. Бірақ мүлт кетті. Оны іліп әкеткен Йосип айып алаңына кіріп, Ромеродан асырып атты. Алайда, өте баяу ұшқан допты қақпашы оңай қағып алды. 45-минутта Жердан Шакири ұзақ арбасып барып, қақпаға қарай доп әуелетті. Оны голкипер сыртқа шығарып жіберді.
Екінші тайм да Аргентинаның шабуылымен басталды. Бірақ бірер минуттан кейін қарсы шабуыл жасауды қайта қолға алған Швейцарияның әрбір алға ұмтылысы тағы қауіпті бола түсті. 50-минутта Ромеро еуропалықтар ұрған бір допты жап-жақсы қағып алып тұрып, кенет қолынан түсіріп жіберді. Ал доп қақпаға қарай домалап бара жатқанда, оны өзі бауырымен басып тоқтатты.
58-минутта аргентиналықтарға кезек келді. Лионель Месси алаңның ортасын жарып өтіп, айып алаңының сол қапталына кірген Маркос Рохоға доп жеткізді. Ал қорғаушы алған добын қақпаның ласы бұрышына қарай зырлатты. Оны қақпашы Диего Бенальо қолының ұшымен сыртқа шығарып үлгерді. 62-минутта еуропалық қақпашыға тағы ерлік көрсетуге тура келді. Тағы Рохо сол қапталдан ашылды. Ал пас алғасын айып алаңының ортасына кірді. Сосын қақпаға қарай бағыттады. Қақпашы оны бір қолымен қағып жіберді. Мұндай жағдай бұл дарбаза маңында 67 және 77-минуттарда да қайталанды. Бұларда да голкипер қақпа торын аман сақтап қалды.
Бұдан ары да Рохо мен Месси осындай оқиғалардың ортасынан табылып жатты. Швейцариялықтар қорғаныс шебі сетіней бастағандай көрінді. Бірақ қақырап кеткен жоқ. Олар шабуылды барынша жанталасып қайтарып бақты. Осымен ойынның негізгі уақыты да бітті. Ал қосымша тайм бітуге 2 минут қалған шамада аргентиналық Анхель ди Мария гол соғып, өз командасына жеңіс сыйлады. Рас, бұдан кейін швейцариялықтар есепті теңестіруге бір рет мүмкіндік алып еді, оны тиімді пайдалана алмады.
Сонымен, Аргентина ширек финалға шықты. Ол енді Бельгия – АҚШ матчының жеңімпазымен 5 шілде күні кездеседі.
Дамир Қожамқұл.
Дереккөз: egemen.kz.
Фото: Sportbox.ru.
