Қоғам • 05 Сәуір, 2023

Күйеуінің бұрынғы әйелін өлтірген елордалық 1,5 жылға сотталды

557 рет

көрсетілді

2 мин

оқу үшін

Жанжал кезінде күйеуінің бұрынғы азаматтық әйелін өлтірген Астана тұрғыны бір жарым жылға сотталды, деп хабарлайды Egemen.kz Алматы ауданының № 2 аудандық сотына сілтеме жасап.

Гүлшахра САНСЫЗБАЙ

Күйеуінің бұрынғы әйелін өлтірген елордалық 1,5 жылға сотталды

Бүгін, 5 сәуірде айыпталушыға қатысты Қылмыстық кодекстің 101-бабы, 1-бөлігі (аффект жағдайында адам өлтiру) дерегі бойынша сот үкімі шықты.

Сот мәліметінше, марқұм М. айыпталушы Р.-ның күйеуімен ресми некеге тұрғанға дейін қарым-қатынаста болған, олардың ортақ баласы бар. Р.-ның күйеуі заңды түрде үйленгеннен кейін де жәбірленуші М.-мен қарым-қатынасын жалғастырған. Бұл Р.-ның ұялы телефонына жіберілген фотолар мен намысына тиетін сөздер жазылған хаттармен дәлелденген.

«Р. жәбірленушінің жүйелі түрде қорлауы салдарынан эмоционалдық қозу (аффект) жағдайында жәбірленушінің ауласына барғанда ауызша жанжал туындаған, жанжал кезінде Р. жәбірленушінің өмірлік маңызы бар мүшесіне пышақ сұғып алған. Соның салдарынан жәбірленуші алған дене жарақатынан ауруханада көз жұмды», деді сот.

Сотта істі қарау барысында тараптар татуласу туралы медиациялық келісімге қол жеткізген.

«Осындай жағдайда соттың Қылмыстық іс жүргізу кодексінің 340-бабының 1-бөлігіне сәйкес сотталушының жағдайын нашарлатуға құқығы жоқ, сотта прокурор Р.-ға 1 жыл 6 ай мерзімге бас бостандығынан шектеу жазасын сұрады. Сотталушының кінәсі Р.-ның өзінің, куәгерлердің айғақтарымен, оқиға орнынан түсірілген бейнежазбамен, сараптама қорытындыларымен дәлелденді», деп түсіндірді сот.

Нәтижесінде, судья Р.-ның қылмысын орташа ауыр дәрежеде бағалап, сотталушының бір жасар баласы бар екенін және оның жасаған әрекетіне өкінуін жеңілдететін мән-жайлар деп ескеріп, 1 жыл 6 айға бас бостандығын шектеу жазасын тағайындады.

Үкім заңды күшіне енген жоқ.