Бұл көрмеге Қостанай облыстық тарихи-өлкетану музейі мен Арқалық қаласындағы Дала өлкесі тарихы облыстық музейі және Амангелді ауданындағы батыр атындағы мемориалдық мұражайынан даңқты тұлғаның өміріне қатысты біраз жәдігер әкелінген. Сондай құнды дүниенің бірі – Амангелдінің сенімді серігі, әйгілі мерген Кейкі батыр әулетінің кебежесі. Оны Арқалықтағы Дала өлкесі тарихы облыстық музейіне Нұралы Ербосынов есімді азамат сыйға тартқан.
Кебеже – сандық секілді тамақ сақтауға арналған жиһаз. Ол еліміздің барлық аймағында кездеседі. Жасау тәсілі мен сыртқы пішіні ұқсас. Тек олардың ерекшелігін алдыңғы бетін көркемдеу тәсілінен байқайсыз. Батыр үйінің кебежесі де тақтайдан жасалған. Маңдайшасы мен есігі қазақы оюлармен өрнектелген. Төменгі суырманың бетіне «1916 жыл» деп жазылған.
1916 жылғы Торғайдағы ұлт-азаттық көтерілісінде Кейкі Көкембайұлы мергендер жасағын басқарып, ерен ерліктің үлгісін көрсетті. Ел ішінде «Амангелдінің көзі мерген, Кейкінің қолы мерген» деген сөз бар. Қос батырдың ерлік жолы жұрт жадынан өшкен емес.
