Кеңес ұлттық ғылыми жүйені басқару ісін жетілдіруге, ғылым және ғылыми-техникалық қызмет саласындағы мемлекеттік саясатты одан әрі дамытуға ықпал етеді. Стратегиялық маңызды шешімдер қабылдауға оң септігін тигізеді деген сеніміміз зор.
Қазіргі дәуір – қоғам өмірінің барлық саласын қамтитын өзгерістер кезеңі. Адамзат қоғамының одан әрі өсіп-өркендеуінде ғылымның атқаратын орны ерекше.
Ғылым да, білім де ұлттың баға жетпес қазынасы десек, қазақ ғылымы тәуелсіздік жылдарында өзгелермен терезесі тең болу үшін дамудың айқын жолын таңдап келеді.
Сондықтан қазір Мемлекетіміздің басшысы Қасым-Жомарт Тоқаев отандық ғылымға баса назар аударып отыр. Әсіресе, университеттердің ғылыми әлеуетін күшейтуге мән беру қажет екенін тілге тиек етіп жүр.
Расында, ғылым мен технологияны, инновацияны дамыту – еліміздің бәсекеге қабілетін арттыратын негізгі саланың бірі. Біз отандық ғылымның басымдықтарын халықаралық талаптарға және ұлттық мүддемізге сәйкес айқындауға тиіспіз. Бұл ретте үздіксіз кәсіби білім беру жүйесінде университеттердің орны айрықша. Өйткені жоғарғы білім – ғылым мен мәдениеттің тоғысқан жері.
Жалпы, еліміздің университеттері мен ғылым саласының алдында кезек күттірмес ауқымды міндеттері көп.
Анығын айту керек, университеттер мен кәсіпорындардың арасындағы байланысты күшейтуге ерекше ықылас бөле бастадық. Өйткені өндіріс ошақтары мен университеттің зертханалары бірігіп жұмыс істеп, бизнес өкілдері ғылымға арқа сүйеп, ғалымдарымыздың мүмкіндігін пайдалана білгенде ғана біздің еліміз әлемдегі іргелі мемлекеттермен, олардың алпауыт компанияларымен бәсекеге түсе алады.
Алдыңғы қатарлы елдер ғылымсыз, озық білім мен инновациялық технологияларсыз мемлекеттің экономикасы мен азаматтардың әлеуметтік жағдайын түзеу мүмкін еместігін жақсы түсініп, өздерінде ғылым саласының дамуына басымдық беріп, ғалымдарын бағалап, олардың жұмыс істеуіне қолайлы жағдай туғызып жатыр.
Таяуда Мемлекет басшысы Парламенттің бірінші сессиясының ашылуында отандық экономиканың дамуы ғылымның жетістіктеріне негізделуі тиіс екенін де қадап айтты. Ғылыми әзірлемелер өндіріске кеңінен енгізіліп, экономиканың өсіміне ықпал етуі керек. Бұл тұрғыда зерттеу университеттеріне ерекше миссия жүктеледі десек, Л.Н.Гумилев атындағы Еуразия ұлттық университеті зерттеу университеті мәртебесін алған-ды.
Қазіргі таңда университет ғалымдары әртүрлі бағытта 200-ден астам ғылыми жобаны жүзеге асырды. Бұл ретте біз ғылыми-өндірістік экожүйені дамытуға, нақты сектордың ірі компанияларымен өзекті бағыттар бойынша жан-жақты ынтымақтастықты кеңейтуге баса назар аударудамыз.
Ерлан СЫДЫҚОВ,
Қазақстан Президенті жанындағы Ғылым мен технология мәселелері жөніндегі ұлттық кеңес мүшесі, академик
