Жаңаөзен қаласындағы «БерӘлі Маңғыстау Company» ЖШС-нің 100-ге жуық қызметкеріне жұмыс берушілер 3 сәуірден бастап жұмыстан шығару процесі басталатынын алдын ала хабарлаған. Оған «Өзенмұнайгаз» АҚ-мен арадағы ұңғымаларды жерасты жөндеу жөніндегі шарт мерзімінің аяқталуы себеп болып отыр. Алайда қызметкерлер өздерін одан әрі жұмысқа орналастыру мәселесін, оның ішінде «Өзенмұнайгаз» АҚ-ның штатына ауыстыру арқылы шешуді талап етіп отыр.
Осыған байланысты компанияның бұрынғы жұмыскерлеріне 2023 жылғы 1 сәуірден бастап еңбек жағдайлары мен әлеуметтік пакеті сақталған және орташа жалақысы 700 мың теңгені құрайтын басқа компанияларға («Кезби» ЖШС және «Ai-Bis» ЖШС) жұмысқа орналасу ұсынылды. Бірақ бұрынғы жұмыскерлер одан бас тартып, «Өзенмұнайгаз» АҚ штатына жұмысқа орналасқысы келетіндерін алға тартқан.
ҚР Энергетика министрлігі бұл мәселе еңбек заңнамасы мен «Самұрық-Қазына» ҰӘҚ» АҚ сатып алу қағидарын ескере отырып, заңнамалық негізде шешілуі тиіс деп санайды.
