Жағымды жаңалық туралы Цифрлық даму министрі Бағдат Мусиннің «Microsoft»-тың еліміздегі бас директоры Сергей Лещенкомен екіжақты кездесуі барысында белгілі болды.
Хаб қызметі Орталық Азия, Әзербайжан, Армения, Грузия, Моңғолия, Пәкістан елдерін қамтиды деп күтіліп отыр.
– «Microsoft» қызметін локализациялау Қазақстанға аймақтық ауқымда технологиялар мен озық шешімдерді тарту орталығына айналуға мүмкіндік береді. Осылайша, хаб «Microsoft» корпорациясының технологиялық даму және инновациялар орталығы бола отырып, шикізаттық емес технологиялық салалардың өнімдерін өндіру мен экспорттауды ынталандыру арқылы адами капиталды дамыту және ұлттық экономиканы нығайтудың драйвері бола алады, – деді Бағдат Мусин.
Министр өткен жылы Мемлекет басшысы Қасым-Жомарт Тоқаев БҰҰ Бас ассамблеясының 77-сессиясы аясында Нью-Йоркке жасаған сапары аясында «Microsoft» компаниясының Орталық және Шығыс Еуропа бойынша бас директоры Мишель Симмонспен кездесу өткізіп, онда қазақстандық өкілдікті аймақтық хабқа айналдыру мәселесі көтерілгенін жеткізді. Сол кезде ел Президенті Үкіметке осы бастаманы жандандырып, оны жүзеге асыруға қажетті жағдай жасау міндетін жүктеген.
– Осы уақыт ішінде Сыртқы Істер министрлігінің және еліміздің Сан-Францискодағы бас консулдығының, сондай-ақ «Microsoft» корпорациясының қазақстандық өкілдігінің қолдауымен бұл мәселені шешу бойынша белсенді жұмыстар жүргізілді. Кремний алқабына сапарым барысында да бұл мәселені ұмыт қалдырған жоқпыз. Енді, міне, бізге қабылданған шешім жөнінде ресми түрде хабарланды, – деді министр.
«Microsoft» компаниясының Қазақстан бойынша бас директоры Сергей Лещенконың айтуынша, елімізде «Microsoft»-тың аймақтық хабының құрылуы маңызға ие. «Қазақстанда тиісті инфрақұрылым бар. Біз бірлескен жобаларды іске асыруға дайынбыз», деді ол.
Сондай-ақ кездесуде корпорацияның ChatGPT сияқты көптеген сервистерінде қазақ тілінің қолдану аясын кеңейту мәселесі талқыланды.
