Грузияның экс-президенті Эдуард Шеварднадзе өмірден өтті

АСТАНА. 8 шілде. Дүйсенбі, 7 шілде күні Грузияның экс-президенті және КСРО сыртқы істер министрлігінің бұрынғы басшысы Эдуард Шеварднадзе 87 жасқа қараған шағында өмірден өтті. Бұл туралы ИТАР-ТАСС хабарлады. Дереккөзде көрсетілгендей, Э.Шеварднадзе соңғы айларда қатты науқастанған. Ол жергілікті уақытпен сағат 12:00-де Тбилиси қаласындағы өз үйінде қайтыс болған. Э.Шеварднадзе 1928 жылы 25 қаңтарда Грузияның Ланчхутск ауданы Мамати аулында туған. Ол 1995-2003 жылдары Грузия президенті болды. Оған дейін Грузин КСР Қоғамдық тәртіпті қорғау министрі (1965-1968), Грузин КСР Ішкі істер министрі (1968-1972), Грузия КП Орталық комитетінің бірінші хатшысы (1972-1985), КСРО Сыртқы істер министрі (1985-1990), КСРО Сыртқы байланыстар министрі (1991 жылдың 18 қарашасынан 8 желтоқсанына дейін) қызметтерін атқарды. Сондай-ақ Э.Шеварднадзе Социалистік Еңбек Ері атағының иегері. Айдар Өрісбаев. Дереккөз: Itar-tass.com. Фото: Pravda.ru.