Ойынның ашылу салтанатын мектеп директоры Елена Хамитова, АҚШ дипломатиялық миссиясының өкілі Джон Орак және «Болашақ» халықаралық бағдарламалар орталығының басқарма төрағасы Олжас Сакенов құттықтау сөздерімен ашты.
АҚШ университеттерінің түлектері қауымдастығының жетекшісі Ринат Кемешовтың айтуынша, іс-шара мақсаты - әртүрлі этностарды топтастыру арқылы қазақстандық ұлттық бірегейлікті қалыптастыру, рухани бірлік идеяларын тарату, оқушыларды спорттық іс-шараларға және басқа да мәдени-бұқаралық іс-шараларға тарту арқылы халықтар достығы мен ұлтаралық келісімді нығайту және сақтау.
Тарихта бұрын соңды болмаған шараның идеясы «Мирас» мектебінің жоғарғы сынып оқушысы Абдраханның ұсынысымен, мектеп басшылығының қолдауымен жүзеге асқан. Оқушылардың айтуынша, мұндай шаралар көшбасшылық және командалық жұмыс сияқты көптеген дағдыларды үйретіп қана қоймай, өзге елдердің мәдениеті туралы көбірек білуге мүмкіндік береді.
Бір жарым сағатқа ұласқан спорт мерекесінде «Мирас»баскетбол командасы 75-70 есебімен басым түсті.
