Ғылыми-танымдық мәні зор іс-шараға өңір зиялылары, университет оқытушылары мен студенттер қатысты. Салтанатты рәсімге онлайн жүйесінде қосылған белгілі тарихшы Бүркітбай Аяған, Назира Бәкірқызы сынды ғалымдар жаңа жинақты жоғары бағалап, авторға жылы лебіздерін білдірді.
Осыдан бірнеше жыл бұрын Алмасбек Әбсадықтың жетекшілігімен «Кейкі батыр ізімен» экспедициясы ұйымдастырылған болатын. Торғайдағы ұлт-азаттық көтерілісінің бас сардары Аманкелді Имановтың 150 жылдығы аясында жарық көрген жаңа жинақтың «Таным» деп аталатын алғашқы бөліміне сол ғылыми-танымдық сапардың материалдары еніп отыр. Экспедиция мүшелерінің сөзіне қарағанда, Кейкі Көкембайұлының ерлік ғұмырнамасына қатысты біршама тың деректер қамтылған еңбек 3 мың дана болып шыққан.
– Сапар барысында біз Аманкелді, Жангелдин аудандарында болып, көнекөз қариялардың аузынан біршама деректерді жазып алдық. Ақсақалдардың айтуынша, Торғай үшін болған кескілескен шайқаста Кейкі батыр мергендер жасағын басқарып, үлкен ерлік көрсеткен. Бекініске мықтап бекініп алған пулеметшілер оқты қардай боратып, көтерілісшілерді алға бастырмай қойған. Аманкелді сарбаздарын бұл тығырықтан алып шыққан нәрсе – Кейкінің мергендігі, ерлігі. Қол мерген басқарған жасақ пулеметшілерді алыстан атып түсіріп отырған. Содан бастап Кейкі батыр атанған, – дейді жинақтың авторы Алмасбек Әбсадық.
«Ер Кейкі – ел есінде» кітабының «Тағзым» деп аталатын екінші бөліміне азат даланың ат үстінде қасқайған күйі оққа ұшқан ең соңғы жауынгерінің ерлік дәстүрін зерделеп жүрген ғалымдар мен қаламгерлердің еңбектері енген.
Жинақ барлық өңірлердегі кітапханаларға таратылатын болады.
Қостанай облысы
