«ZHEIF-2023»: Мүмкіндіктер алаңы

«Zhambyl Economic and Invest­ment Forum – 2023» халықаралық инвестициялық форумы аясында әлеуетті инвесторларға өңірдің бар­лық мүмкіндіктері жан-жақты таныстырылды. Жаңартылған энер­гия көздері, туризм, жер қойнауын тиім­ді пайдалану, ауыл шаруашы­лы­ғы саласындағы мүмкіндіктер инвесторлар назарына ұсынылған халықаралық іс-шара барысында шетелдік ірі компаниялармен 700 миллионнан астам АҚШ долларына келісімшарттар жасалып, отандық кәсіпкерлер мен шетелдік инвес­торлар арасында 20 стратегиялық келісім мен меморандумдарға қол қойылды.

Әулиеата топырағына ат басын бұрған мәртебелі меймандарға бірінші кезекте Шу ауданындағы «Тараз Химиялық Паркі» арнайы экономикалық аймағының мүм­кіндігі таныстырылып, халықаралық форум аясында бас қосқан мамандар инвестициялық жобаларды дамыту мақсатында ұйымдастырылған кеңесте пікірлерін ортаға салды.

Өңір басшысының бірінші орынбасары Нұржан Календеров әлеуетті инвесторлармен өткен кездесу барысында экономикалық аймақтағы ірі жобалардың мүмкіндігі туралы сөз қозғады. Сонымен бірге «Тараз Химиялық паркі» АЭА басқарма төрағасы Қайрат Мұқамбетқалиев алдағы уақытта жүзеге асырылатын бірқатар жобалар жөнінде ойын ортаға салып, оларға экономика­лық аймақ тарапынан көрсетілетін же­ңілдіктерге тоқталды.

«QazIndastry» АҚ бизнесті ынталандыру дирекциясының басшысы Арыстанбек Сағиев өз сөзінде кәсіп ашуға ниетті инвесторларға мемлекет тарапынан көрсетілетін көмектер туралы жан-жақты әңгі­меледі. Алдағы уақытта өңір эконо­микасының локомотивіне айналатын «Тараз химиялық паркі» арнайы экономикалық аймағында бүгінде жалпы құны 249,7 миллиард теңге болатын 5 инвестициялық жобаны іске асыру үшін 5 қатысушы тіркелген. Олардың қатарында геосинтетикалық мембраналар, натрий цианиді және ферросилиций өндіру жобалары бар. Аталған жобалар сәтімен жүзеге асқанда мұнда 2 000 адамға арналған жаңа жұмыс орны ашылмақ.

 

Almaly resort-ке туристер ағылатын күн жақын

«Zhambyl Economic and Invest­ment Forum – 2023» халықаралық инвестициялық форумы аясында Жамбыл ауданындағы «Almaly resort» этнотуристік демалыс аймағы ашылды. «Фортис Констракшн» ЖШС Гродекова ауылдық округі аумағынан салған демалыс орталы­ғына бүгінге дейін 700 миллион теңге инвестиция тартылған. Мұн­да 10 шақырым электр желісі жүр­гізіліп, жобада көзделген ғимарат­­тар бой көтерген. Жалпы, аумағы 9,6 гек­тар жерді алып жатқан демалыс орта­лығындағы құрылыс жұмыс­та­рын уақтылы аяқтау үшін 80 азамат жұмысқа жұмылдырылған болатын.

Этнотуристік демалыс аймағы­ның ашылу салтанатына Мәдениет және спорт министрлігі Туризм ин­дустриясы комитетінің төрағасы Дастан Рысбеков бастаған мәртебелі қонақтар және инвесторлар мен бизнес өкілдері қатысты.

«Фортис Констракшн» ЖШС басшысы Досан Рымтаев мәртебелі меймандарға еуропалық үлгіде салынған орталықтың мүмкіндігін жан-жақты таныстырды. Орталықта 70 адамға арналған 7 коттедж, 8 қонақүй, еуропалық үлгідегі мон­шалар, 150 адамды тамақпен қам­тамасыз етуге арналған мейрамхана, техникалық және сервистік нысан­дар, бассейндер, футбол, теннис алаң­дары, 120 адамға арналған ашық демалыс орны, ат спортына арнал­ған алаң, балық өсіруге арналған тоған салынған.

Серіктестік басшысының айтуын­­ша, құрылыс жұмыстары 10 ай­дың бедерінде жүргізілген. Ал ор­та­лықты одан әрі қарай түр­лендіру, бірқатар қажетті нысандарды аяқтау үшін 300 миллион көлемінде қаражат жұмсалмақ. Демалыс аймағындағы атқарылған ауқымды жұмыстармен толықтай танысқан қонақтар орталықтың туристерді қабылдаудағы әлеуетін жоғары бағалады.

 

400 азамат жұмыспен қамтылады

Форумның алғашқы күнінде Қордай ауданындағы «KORCEM» ЖШС-на қарасты цемент зауытының құрылысы басталды. Өңір басшысы Нұржан Нұржігітов, сингапурлық «ICG» компаниясының өкілі Вей Пинг, «KORCEM» ЖШС-нің атқарушы директоры Станислав Щербаковтың қатысуымен аталған зауыт құрылысының іргетасына капсула салу рәсімі өтті.

«Мемлекет басшысының тапсырмасына сәйкес өңірімізде жаңа жұмыс орындарын ашу, ірі инвес­торлар тарту бойынша ауқымды жұмыстар атқарылуда. Өткен жыл­дың қорытындысына сай өңірге жалпы сомасы 400 миллиард теңге­ден астам инвестиция тартылды. Ал биылғы жылдың бірінші тоқсанында облыстың негізгі капиталына 70 миллиард теңгеге жуық инвестиция салынды.

Бүгінде өңірде жалпы құны 1,5 триллион теңге болатын 10 ірі инвес­тициялық жобаның пулы жа­сақ­талған. Мұнда 4 500-ге жуық жа­ңа жұмыс орны құрылады деп жос­парланып отыр. Аталған тізім бүгін «International Сement Group LTD» сингапурлық әріптестеріміздің инвестициялық жобасымен және «КОRCЕМ» серіктестігінің цемент өндірісі бойынша зауыт құры­лысымен толығып отыр», дейді өңір басшысы Нұржан Нұржігітов.

Облыс әкімінің айтуынша, жер­гілікті атқарушы органдар тарапы­нан бұл жобаға жан-жақты қолдау көрсетілмек. Ал «KORCEM» ЖШС-нің атқарушы директоры С.Щер­баковтың айтуынша, зауыт жаңа технологиямен жабдықталмақ. Сондай-ақ бұл Орталық Азиядағы заманауи кәсіпорындардың бірі болмақ. Жалпы құны 50 миллиард теңге болатын жобаның жылдық қуаты 1,2 миллион тоннаны құрайды. Құрылыс жұмыстарына 900 адам тартылады. Жоба іске қосылған соң жергілікті тұрғындар үшін 400-ге жуық жаңа жұмыс орны ашылады. Зауыттың цехтары 2024 жылдың соңына қарай кезең-кезеңімен іске қосылады. Ал 2025 жылы толық қуатында жұмыс істейді.

Сонымен қатар Ауыл шаруа­шы­лығы вице-министрі Әбілхайыр Тамабек, облыс әкімінің орынбасары Қанатбек Мәдібек бастаған топ Қордай ауданындағы «GreenwiII» ЖШС-нің жылыжай кешенімен, Меркі ауданындағы «Мыхан Орда» ЖШС-нің жаңбырлатып суару технологиясымен, «Жеміс-жидек» серік­тестігінің құлпынай алқабы және «Ар-Ас» шаруа қожалығының «Тау қымыз» өнімін шығаратын цехтың жұмысымен танысты. Форум аясында «Мыхан Орда» шаруа қожалығының егіс алқабында ауыл шаруашылығы бағыты бойынша семинар-кеңес ұйымдастырылды.

Семинарға көрші Қырғыз Рес­пуб­ликасы Талас облысының губер­наторы, ауыл шаруашылық министр­лігінің, Қытай, Оңтүстік Корея, Түркия елдері ірі компанияларының өкілдері, шаруалар, ғылыми-зерттеу институтының мамандары қатысты. Шаруалар мен инвесторлар салалық министрлік пен жергілікті билік өкілдеріне сауалдарын жолдап, әртүрлі ұсыныстарын айтты.

 

Онлайн тіркеуден озып тұр

Цифрландыру бағыты бойынша атқарылған жұмыстарды саралау үшін Иран, Литва, Қытай, Сауд Арабиясы және еліміздің әр қиырынан келген қонақтар Ш.Мұртаза атындағы Халықаралық Тараз инновациялық институтының базасындағы IT академиясының жұмысымен танысты.

Форум аясында цифрландыру бағыты бойынша қонақтар «Қоғамдық келісім» үйінде «Ақылды қалалардың» мәселелері мен дамуы жөніндегі жиынға қатысты. Сондай-ақ Цифрлық даму, инновациялар және аэроғарыш өнеркәсібі министрі Бағдат Мусин өңір тұрғындарымен және «ZHEIF-2023» форумының қатысушыларымен кездесті.

Мемлекет басшысының тапсырмасына сәйкес халықпен кездесіп отырғанын айтқан министр елімізде цифрландыру саласында атқарылып жатқан жұмыстарға тоқталды.

Министрдің айтуынша, мемле­кеттік қызметтерді цифрландыру ісі жолға қойылған. Бүгінде мем­лекеттік қызметтердің 92 пайызы автоматтандырылған, электронды форматқа ауысқан. Біріккен Ұлттар Ұйымының рейтингісінде Қазақстан онлайн қызмет көрсету бойынша әлемде 8 орында болса, телекоммуникация саласында 28 орынды иеленген.

Өткен жылы Жамбыл облысында 1 миллион 800 мың қызмет көрсетілген болса, оның 60 пайызы онлайн түрде жүзеге асырылған. Ал көлікті онлайн тіркеу бойынша жамбылдықтар көш бастап тұр.

Халықаралық форум аясында Байзақ ауданындағы «Алель Агро» АҚ-ның құрама жем шығару зауыты іске қосылды. Деректерге сенсек, зауытының жалпы құны 4,4 миллиард теңгені құрайды. Құс фабрикасында өндірілетін өнімді көбейту және бағаның қолжетімді болуын қамтамасыз ету мақсатында іске қосылған зауыт жылына 96,0 мың тонна жем өндіруге қауқарлы.

«Құс еті өнімін арттыру және ба­ға­ның қолжетімділігін қамтамасыз ету үшін ашылған «Алель Агро» акционерлік қоғамының құс фабри­ка­сындағы жылына 100 мың тоннаға жуық жем өндіретін зауыттың бола­шағы зор.

Облыста 2019-2021 жылдары 4 ірі құс фермасында 15,4 мың тонна құс еті өндіріліп, 2022 жылы қосымша «Алель Агро» акционерлік қоғамының құс фабрикасы құрылды. Алдағы жылдары бұл бағыттағы жұмысты жал­ғастырып, кәсіпорындар ашу көзделген. 2026 жылға қарай құс етін өндіру көлемін 15,4 мың тоннадан 70 мың тоннаға дейін арттыру жоспарлануда. Осылайша өз-өзімізді құс етімен қамту мәселесі шешіледі», дейді өңір басшысы Н.Нұржігітов. Оның айтуынша, зауыт толық қуатында жұмыс істегенде ішкі нарықты толығымен қамтиды.

Ауыл шаруашылығы вице-ми­нистрі Әбілхайыр Тамабек инвес­тициялық форум аясында шикі­зат­тан терең өңдеуге көшудің ма­ңыз­­дылығына тоқталып, құрама жем өн­діруге мемлекет тарапынан 25 пайыз субсидия қаралғанын жеткізді.

Бұл күні Байзақ ауданында гофр­ленген картон және тастан жаса­латын дайын қағаз қаптама өн­діру зауыты іске қосылды. «KazStoneBox» ЖШС-нің гофрленген картон өндіру зауыты соңғы нұсқадағы автоматтандырылған қондырғылармен жабдықталған.

«Осындай өндіріс ошақтарын ашу бойынша инвесторларды тарта отырып, тиісті жұмыстарды жалғастыра береміз. Бұл жоба аудан және өңір экономикасының дамуына оң әсерін тигізеді. Ал жергілікті атқарушы органдар тарапынан өндірістің үздіксіз жұмыс істеуіне жан-жақты қолдау көрсетіледі», деді өңір басшысы зауыттың іске қосылу рәсімінде сөйлеген сөзінде.

Құны 1,7 миллиард теңге болатын жоба жылына 12 мың тоннаға жуық өнім өндіруге қауқарлы. Мұнда 50-ге жуық тұрақты жұмыс орны ашылады деп жоспарланып отыр. Серіктестік басшысы Б.Үмітқалиевтің айтуынша, мине­ралды шикізаттан жасалған қап­тама шығаратын кәсіпорынның посткеңестік елдерде баламасы жоқ, шикізат ретінде минералды кальций карбонатын пайдаланатын бірегей өндіріс орны болып отыр.

Форум аясында Әулиеатаға ат басын бұрған меймандар өңірдің тарихи орындарын тамашалады. Олар «Тараз – шеберлер қаласы» көрмесін тамашалап, жамбылдық қолөнершілердің қолынан туындыларын жоғары бағалады. Ұнатқан заттарын сатып алғандар да болды. Қазақстанның әр қиырынан келген азаматтар Ақыртас тарихи кеше­ніне барды. Кейіннен Айша бибі, Тектұрмас, Қарахан кесенелерінде болып, өңір тарихымен танысты.

 

«Әулиеата өнімдері 17 елге экспортталады»

«Zhambyl Economic and Invest­ment Forum – 2023» халықаралық экономикалық және инвестициялық форумының екінші күні пленарлық отырыстармен басталды. Форум барысында сөз сөйлеген өңір басшысы Нұржан Нұржігітов халықаралық іс-шараның аймақ үшін маңыздылы­ғын атап өтті.

«Өңірде «жасыл технология­ларды» енгізе отырып, ауылшаруа­шылығын дамытуға мүмкіндік мол. Біздің облыс баламалы энергия көздері саласындағы жобаларды іске асыруда ең қолайлы өңірлердің қатарына кіреді. Біз өз өнімдерімізді әлемнің 17 еліне, атап айтқанда Қы­тай мен Парсы шығанағы мемле­кеттеріне экспорттаймыз. Осындай транзиттік әлеуетке ие бола отырып, өңір бүкіл Орталық Азияның негізгі логистикалық орталығына айналмақ», деді Нұржан Нұржігітов.

Аймақ басшысы өз сөзінде жер­гі­лікті билік тарапынан қажетті инвес­тициялық жағдайлар жүйелі жасалып жатқанын тіліне тиек етті. Жамбыл облысы бүгінде Германия, Түркия, Сингапур, Қытай, Үндістан, Франция, Оңтүстік Корея, Жапония сияқты елдермен экономикалық байланыс орнатқан.

«Өңірде 350-ден астам ірі және орта кәсіпорындар бар болса, оның негізгі бағыттары – химия, азық-түлік, металлургия, құрылыс материалдары өндірісі. Облыста 200-ден астам түрлі пайдалы қазбалар бар. Облыс фосфорит және плавикошпат шикізатының бірегей базасы болып табылса, түрлі-түсті металдар, барит, көмір, қолөнер және техникалық тастар, құрылыс материалдарының қоры жеткілікті.

Біз агроөнеркәсіптік кешенде, туризм, өнеркәсіп және баламалы энергия өндірісі салаларында жал­пы сомасы 3,8 миллиард АҚШ долларын құрайтын әлеуетті инвес­тициялық жобаларды әзірлеп, қызығушылық танытып жатқан инвесторларға ұсынуға дайынбыз», дейді Н.Нұржігітов. Сондай-ақ ол өңір экономикасын өркендету үшін инвесторлардың қатысуын кеңей­туге және облысқа туристерді тартуға жергілікті атқарушы билік мүдделі екендігін баса айтты.

Ұлттық экономика министрі Әлібек Қуантыровтың айтуынша, Жамбыл облысының 90 ауылында биыл 13,6 миллиард теңгеге 271 жоба іске аспақ. Сондай-ақ өткен жылы жұмыс істеген шағын және орта кәсіпкерлік субъектілерінің саны 29 пайызға өсіп, 92,6 мыңға жеткен. Ал жұмыспен қамтылғандардың саны 16 пайызға артқан.

Жамбыл облысында қаңтар-нау­рыз айларында құрылыс саласында 31 пайыз, өнеркәсіп саласында 4,4 пайыз өсім қамтамасыз етілгендігі айтылды. Ал инвестицияның нақты өсу қарқыны 3,1 пайызға айналып, 69 миллиард теңге болған.

Екі күнге созылған халықаралық форум аясында шетелдік компания­лармен құны 700 миллион АҚШ доллар тұратын меморандумдарға қол қойылды. Олардың қатарында Индия, Сингапур, Германия, Венгрия секілді бірқатар мемлекеттердің инвесторлары бар.

Шетелдік компаниялар Жамбыл облысы аумағында ферроқорыт­па, цемент зауытының құрылысы, құрылыс материалдарын өндіру, күн электр стансаларын салу, та­мақ өнеркәсібі және логистика индус­триялық паркі секілді жобаларды жүзе асыруды жоспарлап отыр.

Халықаралық форум барысында «Қазақстанның үздік тауары» көрме-байқауының жеңімпаздарын марапаттау іс-шарасы ұйымдастырлып, топ жарғандарға құрмет көрсетіл­ді. Жамбыл облысы кәсіпкерлер Пала­тасының ұйымдастыруымен өткен байқауға Жамбыл облысының 150 тауар өндіруші компаниясы өз тауа­рын ұсынды, оның ішінде 40 тауар өндіруші «Бір ауыл бір өнім» жобасы аясында қатысты.

Инвестициялық форум аясында өңір басшысы Нұржан Нұржігітов бірқатар отандық және шетелдік компаниялардың өкілдерімен дидарласып, пікір алмасты.

Франциялық «Total Open Servi­ces» компаниясы Мойынқұм ауданында қуаты 1 ГВт жел электр стан­сасын салуды жоспарлап отыр­ғаны мәлім. Жоба құны – 500 миллиард теңге. Жоба жүзеге асқанда 300 тұрақты, 1 000 уақытша жұмыс орны құрылмақ. Әкіммен кездесуде «Tоtal Open Services» ЖШС Бас директоры Тьерри Плезан жер телімін бөлу, экологиялық қауіп­сіздікке қатысты мәселелерді көтерді. Облыс әкімі инвесторларға тиісті заң шеңберінде жан-жақты қолдаулар көрсетілетініне сендірді.

Ал үндістандық «Monnet Group» компаниясы аймақта жоғары сапалы ферросилиций, ферромарганец шығаратын зауыт салу жобасын жүзеге асыруға кіріскен. Сон­дай-ақ «Bazar Fur» Түрік компа­ниясы өңірде тұрмыстық техника өндіретін зауыт салуға ниетті. «KazBioSorgo» ЖШС өкілдері қант құрғағын өсіру және өңдеу жо­басын таныстырса, «Monterra Qasaqstan» ЖШС компаниясының өкілдерімен Қордай ауданында тау-кен металлургия комбинатын салу мәселелері талқыланды. Бұдан бөлек кездесуде «Taraz Gelatin» ЖШС басшылығы желатин өндірісінің жобасын ұсынды. Сонымен қатар «Wanlin Group Limited» қытай компаниясының өкілі кептірілген пияз өндіретін зауыт салу туралы жоспары бар екенін жеткізді.

Басқосуда әрбір жоба бойын­ша жауапты тұлғаларға нақты тапсырмалар берілді. Тапсырмалар­дың іске асырылу барысы облыс әкімінің жеке бақылауына алынбақ. Жалпы, бұл күні Нұржан Нұржігітов 20-ға жуық іскерлік келіссөздер жүргізді.

Кейіннен өңір басшысы кон­сулдық корпус өкілдерімен кез­десті. Кездесуге Иран Ислам Респуб­ликасының Алматыдағы Бас консулы Мохсен Фағани, ҚХР Бас консулы Цзян Вэй, Бельгия Корольдігінің Құрметті консулы Ван ден Вейх қатысты.

Тараптар екіжақты ынтымақ­тастық пен стратегиялық әріптес­тік­ті дамыту мәселелерін, елдер ара­сындағы сауда-экономика­лық қа­ты­настардың әлеуетін талқы­ла­ды. Облыс әкімі өз кезегінде өңір­­дің инвес­тициялық мүмкіндіктері туралы ойымен бөлісті. Ал консул­­­дық корпус өкілдері Жамбыл облы­сы­­­мен әлеуметтік-экономикалық бай­­ланыстарды нығайтуға мүдделі екен­­діктерін жеткізді.

 

Жамбыл облысы