– Қазақшаны қай кезде қалай үйренгенімді өзім де білмеймін. Шамасы, ойын баласы кезімде, ауладағы балалармен сөйлесе жүріп, үйреніп алсам керек, – деген Алена бізге өмір жолын қысқаша таныстырды. Ол – Жезқазған қаласының тумасы. Әкесі Александр – кенші, анасы Валентина – сауда училищесінің мұғалімі еді. Нағашы әжесі Мингаян татардың қызы болатын. Ол кісі Жезқазғанның іргесіндегі «Геологический» деп аталатын ауылда тұратын. Алена кішкентай кезінде көбіне әкесінің қолында жүрді. Оған әжесінің намаз оқитыны, апта сайын жеті шелпек пісіріп, тарататыны қызық көрінетін.
– Әжем бізге «қазақ балалармен дос болыңдар, қазақша үйреніп алыңдар, біз солардың жерінде жүрміз» деп отыратын. Әрине, ол кісінің мұндай сөздерін сол кезде ұғына қоймадық. Өсе келе әжеміздің неге солай деп айтқанын түсіндім ғой, – дейді Алена қазақ тілін білуге зор ықпалы тиген әжесі туралы.
Қыздарының қазақшаға жүйрік екенін білгенмен, Александр мен Валентина оны қазақ мектебіне бергісі келмеді. «Өзіміз қазақша білмейміз, ертең оның сабағына қайтіп көмектесеміз» деп тартынды. Қызық болғанда, мектеп табалдырығын аттаған кезде Аленаның орысшасы ойдағыдай болмай шықты. «Жалғауларды бұзып айтамын. Білгенім сол болса қайтейін? Мұғалім апайлар «Сен өзі орыссың ба, кімсің?» деп ұрысатын. Сөйтіп жүріп орысшаны да үйрендім-ау. Бірақ мектепте қазақ тіліне келгенде оқушының алды болдым. Қазақ тілі пәні бойынша облыстық, республикалық олимпиадаларға үздіксіз қатысып, әрқашан жүлделі орындар иеленетінмін». Мектептегі оқушылық кезеңді ол осылайша еске алады.
2009 жылы мектеп бітірген соң, Е.Бөкетов атындағы Қарағанды мемлекеттік университетіне оқуға түсіп, ағылшын тілі пәнінің маманы болып шықты. Қазір сол мамандығы бойынша Сәтбаев қаласындағы өзі ашқан тіл үйрену орталығында ағылшын тілінен сабақ береді. Осыдан соң, Аленаны «Оқуы – орысша, тілі – қазақша, сабағы – ағылшынша» демегенде қайтеміз?
2019 – жылы Алена қазақ азаматы Ақан Әбдірахмановқа тұрмысқа шығып, шаңырақ көтерді. Беташарда иіліп сәлем салып тұрған келіннің орыстың қызы екенін естіген тойға жиналғандар оған сүйсініп тұрды. Қазір олардың отбасында екі жарым жастағы Томирис өсіп келеді.
– Отбасымызда маған қарағанда күйеуім орысшаға бейімдеу. Ол да мектепте орысша оқыған ғой. Қазақша-орысша араластырып сөйлейді. «Осы маған жеңілдеу» деп ақталады. «Мұның дұрыс емес» деп қоямын. Кейде тыңдайды, кейде ұмытып кетеді. Томиристің тілінің қазақша шыққанын қалаймын. Оған қазақша сөйлеймін. Қазақ тілі – оның ана тілі ғой, – деген Аленаның сөзінен оны ұрпағының ертең қай тілде сөйлейтіні ойлантып, толғандыратыны сезілгендей.
Шіркін, қазақтың барша келіндері осылай ойласа ғой!
Ұлытау облысы,
Сәтбаев қаласы
