Қатысу аясы кеңейіп келеді

Индустрия және жаңа технологиялар министрлігінің қолдауымен жыл сайын өткізілетін «NIFS50K» республикалық бизнес-жоспарлар байқауы қатысушылардың үлкен қызығушылығын тудырып жүр. Оны оған жолданатын өтінімдер санынан аңғаруға болады. Тек былтырдың өзінде 376 адам қатысуға тілек білдірген. Жас ғалымдар мен талантты өнер­­тапқыштар, бизнес саласына енді араласқан кәсіпкерлер ұсынған жобалардың жүзеге асуына, әлеуметтік маңызы бар бас­тамаларды қолдауға, оларды әзір­леушілерді бизнес-жоспарлауға оқытуға мүмкіндік беретін конкурс аясындағы «Инновациялық автобустың» алғашқы сапары Қызылжар өңірінен басталды. Құрамында Технологиялық даму жөніндегі ұлттық агенттіктің өкілдері мен сарапшылары бар шығармашылық топ С.Мұқанов атындағы әмбебеп кітапханада жергілікті шағын және орта бизнес, үкіметтік емес ұйым жетек­­ші­лерімен, инновациялық жоба­лар авторларымен кездесіп, сапар­дың мән-мақсатын түсіндір­ді. Облыс әкімінің орынбасары Ерлан Әукенов өз сөзінде жас­тардың ізденісі мен белсенділігін арттыру мақсатымен ұйымдас­ты­рылып отырған байқаудың жаңа­шылдығын атап өтіп, биыл да көптеген жоба ұсыны­лып отырғанын жеткізді. «Техно­логиялық даму жөніндегі ұлттық агенттік» АҚ директоры Артем Возжаев өңірлерде іріктелген конкурсанттар Астанада өтетін байқаудың жартылай айналымына жолдама алатынын, жүлделі орындар үшін сайысқа түсу мүмкіндігіне ие болатынын атап көрсетті. Байқау жеңімпазы 7,5 миллион теңге жүлдені қанжығаға байласа, жүлдегерлер де грант иеленеді. Өткен жылы бас жүл­дені Талдықорған қаласының тұр­ғыны, «Аймақтардағы су көтер­гіш құрал» жобасының авторы Мырзахмет Төлеев жеңіп алған. Оның өнертапқыштығы электр энергиясын тұтынбай-ақ өзен жағалауындағы аймақтарды суаруға арналған. 2,5 миллион теңге қаржылай сыйлықты алған ақтөбелік Нұрлан Жанбурин үйді шаң мен тозаңнан, түтіннен, маса-шіркейден қорғайтын қара­пайым ауа тазалау жүйесін ойлап тапқан. Алматылық Максим Подлесныхтың «Алдыңғы жеңіл модуль негізінде жаяу жүргіншіні қорғау құрылғысы» жобасы да сарапшылар тарапынан жоғары бағаланған. Солтүстікқазақстандық өнер­тап­қыштар сарапшылар назарына 30-ға жуық жоба ұсынып, олардың арасында М. Қозыбаев атындағы Солтүстік Қазақстан мемлекеттік университетінің өкілдері өте-мөте белсенділік көрсетті. Колледж ұстазы Алексей Михайлов әзірле­ген «Ақылды үйлер» жобасы жиналғандар көңілінен шықты. Сол сияқты Петропавл гуманитарлық кол­леджі­нің студенті Нұрлан Тұр­сынов дайындап әкелген «Бола­шақтың компьютері» жобасы көпқырлы қызмет көрсету ерек­шелігімен таңғалдырды. Байқау шеңберінде инно­ва­циялық және кәсіпкерлік шебер­ліктің қыр-сырына үйрететін тренингтер өткізіліп, түрлі кеңестер берілді. Өмір ЕСҚАЛИ, «Егемен Қазақстан». Солтүстік Қазақстан облысы.